June 14, 2012 (Ningani) : Tunkar Pathinni - June 17, 2012 hi Mizoram Baptist Kohhran Nipawimawh “Relief Sunday” a ni a. Mizoram Baptist Kohhran Biak In tinah he Ni pual hian hun hman a ni ang. Kumina Relief Sunday Thupui atana kan thlan chhuah, “Nang pawh chu ang chuan ti ve rawh” (Luka 10:37) tih hi a ni ang a. Kohhran tinah tawngtai thupui inang hmangin tawngtairualna neih a ni ang.
Tawngtai rualna:
1) BCM in Relief hna kan thawhna a kan in phalna te Pathian ropuina atan a lo pun zel theih nan. 2) BCM Relief and Development Department hnuaia thawktu ten ni tin inpekna thara hna an thawh zel theih nan. 3) BCM pawn lam pawl hrang hranga kan thawhpuite nen thawh hona tha kan neih zel theih nan. 4) Hun changtuin tawngtai subject tul atih dangte thawh belh bawk ni se.Relief Sunday Thuchah
Chawhma inkhawma chhiarchhuah tur
Zosap Missionary-te rawngbawlna ki pawimawh tak pakhat chu Relief hna thawh hi a ni a. Pathian thu anih avangin an ngai pawimawh em em a. BCM pawhin ngai pawimawhin kan chhunzawm zel a. Chu hna chu, mite an mamawhna zawna an mamawh lai taka tanpuina hna thawh hi ani a. BCM chuan 1 August 1990 atang khan he rawngbawlna hna thawktu pawl hran Relief and Development Department dinin vawiin ni thlengin hma a la mek a. Relief hna thawh hi Mizo nunze mawi nen inmil tak, Pathian ram rawngbawlna hmanraw pawimawh tak ani a. Kohhran neinung zawkte pawhin nasa takin an thawk a, chumi avang chuan Chhandamna thu hrilna kawng khawvel hmun tinrengah Remchang a siam belh zel a. He rawngbawlna hmang hian mi tam takin Lal Isua Krista leh a chhandamna an chang mek ani.
Kumina Relief Sunday Thupui atana kan thlan chhuah, “Nang pawh chu ang chuan ti ve rawh” tih hi a ni a. Mi thiamte chuan Vanram pana kan kalkawnga tih tur leh kal kawnga mihringte rilru put hmang chi thum tarlanna a ni e, an ti thin a. A pakhatnaah chuan, Suamhmang rilru, a pahnihnaah chuan mahni chauh inngaihsak duhna rilru leh a pathumnaah chuan a zirtir tum tak, Pathian rilru mi dangte tana inpekna a ni an ti a. Kan thupui thlan chhuah a Lal Isuan, nang pawh chu ang bawk chuan va ti ve rawh, ti a mahni neih leh hun senga mi dangte tanpui hna thawk tura min zirtirna hi ataka zawm har tak, nimahsela Amah zuitute tih atana thu min chah ani si a. Tun laiin kan rama mihring lo pung zelin mamawh a ti pung zel a. Chu mi rualin hmasawnna in lei lam malsawmna tam tak a rawn thlen a. Lei lam malsawmna tam tak dawngtu te leh dawng tlem zawkte pawhin in tanpui tawn hi kan mamawh ve ve a. Thenkhatin lei lam malsawmna an chante duh tawk nei lovin mi dangte chanai pawh laksak pawisa lovin hma an la a. Chu tih laiin an in lamah te chuan thlamuanna leh lungawina nei thei chuang lovin an rum a. Thenkhat an dinhmuna lungawia mi dangin an chan ve ai chuan ti a kawmpui tlat kan awm bawk a. Tin, lei lam hausakna chang tlem zawkte pawh hausa zawkten engmaha ngaih lem loh thil pawh nei a lungawina nen hlim taka hun hmang an awm bawk a. Chuvangin kan mamawhte Lal Isua Krista hminga Thu leh thiltih a in tanpui tawn hi Relief rawngbawlna pawimawh tak ani! Hawh u, vawiin Relief Sunday hian kan Kohhran member puite mai bakah kan hmuh phak leh hriat phaka mite Lal Isua Krista min duh anga an mamawh thawhsak theih nana tul, Sum leh pai leh Thinlung thar kan neih theih nan Tawngtaiin i dil ang u.
