R&D Rangva sem lai[/caption]
Tunkar Pathinni – June 14, 2015 hi Mizoram Baptist Kohhran Nipawimawh “Relief Sunday” a ni a. Mizoram Baptist Kohhran Biak In tinah he Ni pual hian Pathianni chawhma Inkhawm hun hman a ni ang. Kumin Relief Sunday Thupui chu “Tanpuivartu hnai reng” (Sam 46:1) tih a ni ang a. Headquarters atanga Relief Sunday thuchah buatsaih chu Kohhran tinah chhiarchhuah a ni ang a, tawngtai thupui inang hmangin tawngtairualna neih a ni bawk ang. (Thuchah chhiar tur)
Tawngtai thupui: 1. Vawiin ni thlenga khuarel chhiatna rapthlak tak laka Pathian venhimna kan chan avanga lawmthu sawina. 2. Kohhran miten Pathian hminga tanpui ngaite hmangaihna nena hna fel leh dik taka an thawh theih nan. 3. NGO hrang hrangte leh Sorkar-in tanpui ngaite tanpuina hna fel leh dik taka an thawh theih nan. 4. Mihring siam chawp leh khuarel chhiatna laka Pathian venhimna dilna.
......................................
2015 BCM Relief hna thawh dan tlangpui Report
M.S.Dawngliana, Director BCM Relief and Development Department
Kum 2015 (1st August) hian BCM Relief and Development rawngbawlna in kum 25-a lo tling ve dawn ta reng mai a. Kum rei lote chhungin he rawngbawlna kal tlanga malsawmna dawngtu mimal leh khawtlang ang pawhin enge maw zat an lo awm ve ta reng mai. Heng kumte min hruai thlengtu Pathian hnenah Lawmthu awm rawh se. BCM ni pawimawh bu-ah khan a lo pian chhuahdan leh Tawngtaipui ngaihna te leh Thuchah-te tarlan ani a. Kohhran hoten Relief Sunday leh R&D Silver Jubilee-te Tawngtaina nen min hmanpui ngei kan beiseiin kan ngen takzet che u ani.
Kumin kumtir atangin Mizoram leh khawvel hmun hrang hrangah chhiatna a thleng nasa hle a. BCM pawh Pathian in midangte tanpuina kawnga hma la turin min duh ani ang tanpuina diltu leh thawhsak tura ngenna kan dawng reng a. Mite tanpuina tura mamawhte a san viau laiin BCM angin sum kan neih tam loh avangin khawvel hmun danga kan thawhpuite hnenah dilna siam ani a. Relief Project pathum kan ziak a. Chungte chu, Control of Malaria outbreak programme leh Mizoram Hailstorm Relief leh Bridge of Life-te an ni a. Kan dil ang zat chiah chiah min rawn pe thei lo mahse kan mamawhte hriain min rawn tanpui den den hlawm a, an chungah kan lawm em em ani. Tun hnaia relief hna thawh dan tlangpui chu hetiang hi ani:
[caption id="attachment_6609" align="alignright" width="300"]
Artemesia (Malaria damdawi)[/caption]
Control of Malaria outbreak Programme hnuaiah hian Zoclinic sawm (10) din belhin Malaria damdawi thing (Artimesia Annua) chin a sem hna thawh mek ani a. Tunah hian kung sangkhat chuang kui tiakin sem mek ani a, June thla chhung chian enkawl theitu tura thlante hnenah pek chhuah zawh tum ani. Hei hi Bye Bye Malaria, Transform Aid International leh Action for Natural Medicine in the Tropics pawl ten min tanpui.
Mizoram Hailstorm relief programme hi kumin a rial leh thlipui tuar chhungkaw zanga tal ten tanpuina an dawn theihna atan a ruahmanna a ni a. Rangva, Thosilen, Silpouline leh Thlai chi leina atana ruahman ani a. BWAid leh BMS lamin 60% vel min rawn tumpui a, a bak hi BCM in kan tum ve turin an rawn beisei a. Tunah hian thawh mek ani.
Bridge of Life Relief project hi Nepal Lirnghing tuartute tana ruahman ani a. BWAid lam chuan BCM kaltlanga he relief hna hi thawh an duh avangin kan mawhphurhna pawh a sang hle ani. Nepal lirnghing tuartute hi ahmun ah tlawhin an mamawhte enho ani a. In leh Lo chan, pawn (Outdoors) a mu mai maite tanpuina hna thawh hmahruaiah June thla chhung ngei hian Thosilen 1000 pek tura ruahman chu a pawisa pawh dawn tawh ani a, Sorkar lam pawhin phalna min pe tawh a umzui mek ani. Hemi bakah hian man tlawm leh a neitute enkawl zui thiam tur (low cost housing) leh hriselna (relief) lam hna ruahmanna kalpui mek ani bawk.
R&D Silver Jubilee kum ani a. A hriatrengna hun hman pawh tum ve ani bawk. Kan inbuatsaihna langsar zualte chu Lehkhabu pahnih, Tlangram lo nghet neih dan Inkaihhruaina bu (Zo-Farm) leh Damdawi lam thiam sang awm lohna hmuna hman tangkai tur (Zo-clinic) bu inkawp leh Dawihnim bu (kan rama hnimhnah damdawi hrang hrang leh a sawngbawl dan) buatsaih ani a. Chungte chu BCM Publication Board in min tih chhuahsak dawn a, kan lawm hle ani. Tin, hei bakah hian In (Building) pakhat, Office leh Mikhual han thlen a conference tenau han tih mai theihna tur, Serkawn, Ramzotlangah sak mek ani bawk.
Tunah hian thawktu 41 (Sub 4 leh Temp 3 leh Con.34) kan awm mek a. AGS in-charge Service Department kaihhruainain hma lak mek ani.
