May 16, 2022 (Thawhtanni) khan Relief & Development Department enkawlna hnuaia ‘Youth Skill Training Centre’-a Puanthui zir chhuak te pualin Sap Upa leh Pu Buanga Hall, Serkawn-ah Graduation Service hman a ni a. Punthui zir chhuak 7 hnenah Certificate leh Puanthui Khawl hlan a ni.
Graduation Service hi Nl. T. Lalfawnveli, Asst. Coordinator in a kaihruai a, Director, Rev. L. Vanlalsanga’n Pathian hnena inkawltirna hun hmangin, Puanthui zir chhuak te hnen atangin fakna hla leh Pu Lalrinawma, Coordinator, R&D hnen atangin thusawi ngaithlak a ni bawk. Pi Baby Lalnunkimi, Tailoring Instructress hnen atangin Youth Skill Training Centre-in Puanthui zirtirna a kalpui dan tlangpui report leh kumin-a zirlai te dinhmun ngaihthlak a nih hnu in, Director, Rev. L. Vanlalsanga’n Puanthui zir chhuakte hnenah Certificate hlan in, Rev.F.Zorinkhuma, MTKP Secretary in Puanthui khawl a hlan. Pi R. Zonunsangi LDC-in kalkhawmte hnenah lawmthu sawiin, Director-in malsawm tawngtaiin inkhawm a khar a ni.
Youth Skill Training Centre ah hian thiam thil peng hrang hrang Training buatsaih a ni a, Puanthui (Tailoring) Zirna hi 1991 atang khan tan niin, Pathian hruaina-in tun thlengin kum tin la chhunzawm zel a ni a. Hrileng avangin kum 2020 leh 2021 ah te zirna kalpui mumal theih a ni lo va. Tun tumah pawh hian tum dang angin Graduate an nei tam thei lo va, kum danga project kalpui thin ang pawha kalpui lovin, thahnemngaihna avangin Releif & Development Department-in a theih ang anga hma la-in an kalpui ta rih a ni.
