February 14, 2023 (Thawhlehni) chawhma dar 11:00 khan Sap Upa leh Pu Buanga Hall, BCM Office, Serkawn-ah R&D Skill Training Centre hnuaia zirna peng hrang hranga zirlaite tan Orientation Programme buatsaih a ni a.  Hun hmasa lamah Rev. L. Vanlalsangan, Director, Relief & Development Department-in Pathian hnenah inkawltirna neiin, zirlaite kal khawmte fuihna thuchah a sawi nghal a. Rbt. Lalrinawma, Coordinator leh Nl. T. Lalfawnveli, Assistant Coordinator ten zirlaite tana hriat tur pawimawh hrang hrang leh an zirna atana tul leh mamawh te kawhhmuhin zirtirna an pe a, Zawhna leh chhanna hun te an hmang bawk. He hunah hian zirna peng hrang hranga zirlai 23 an kal khawm a ni.

Hun rei tawh tak atang khan R&D hnuaiah hian Skill Training Program hrang hrang kal pui a ni a. Kum 2023 atan - Puanthui, Beauty & Wellness leh Electrician lama zirlai ten an zirlai an tan leh tawh a. Heng zirlaite hian an zirlai te tha taka an zir theih nan leh R&D Skill Training Program kal dan phungte an hriat fiah theih nan Orientation hi buatsaih a ni a, zirlaite pawhin hlawk thlak an ti hle.

Tuna Training Programme kal mek bakah hian April thla atang hian Computer leh Allumminium & Steel Fabrication Training pawh tan tum a ni a. Skill Training Program hrang hrang te hi thingtlang lama thalai hna nei lo dinhmun chawisan nan leh rawngbawlna kawnga hmasawnna na atan R&D local budget atang leh Canadian Baptist Ministry te nena kan thawhhona atangin theihtawp chhuah mek zel a ni.