Mizoram Baptist Kohrhan, Relief& Development Department hnuaia Zo clinic Technician te pualin Urinalysis Training (Zun kawnga hnai leh lungte awm enna) a buatsaih a, hetah hian Technician khaw hrang hrang atangin mi 5 training pek an ni a, November 6, 2020 (Zirtawpni) khan R&D Training Centre, Ramzotlang-ah Graduation Programme hmangin Training chhuakte hi Certificate pek an ni.
Graduation Ceremony hi Director Pu Lalrinawma’n a kaihruai a, Zirlaite chanchin tlangpui sawiin Training pek dan te a sawi hnuah AGS Service Rev. R. Lalbiakliana’n Certificate hlanin thuchah tawi a sawi bawk. Tuntuma Training chhuakte hi Batch 3-na niin a hma-in mi 16 in training hi an lo zo tawh a ni. Heng Training chhuakte hi Certificate bakah Zun Test na khawl pek vek tur an nih laiin hrileng avanga Aizawl AMC ah Lockdown kalpui mek a nih avangin khawl hi a lo thleng thei rih lo va, remchang hmasa berah khawl hi pek leh an ni ang.
BCM R&D hian Zo Clinic Programme neiin Thingtlang lam hriselna kawnga hma an sawn theih nan Technician Training hrang hrang a lo buatsaih tawh thin a. Thisen en te, Injection te, BP Check te, Blood Sugar leh Zun Exam te pawh Training pek an ni thin a, Malaria umbona atan Bye Bye Malaria Project te pawh an lo kalpui tawh thin a ni. Heng hmalakna hrang hrang atan hian thingtlang khua thlan bika thawktu tur Community Health Volunteer Training pawh neih thin a ni bawk.
