Rev. C. Rothuama (70) chuan nimin (July 6, 2014) tlai dar 3:00 khan khawvel chhuahsanin a rawng a lo bawl thin,  a Lalpa hnenah a chawl ta. Nizan khan a ruang hi tlaivarpui niin vawiin hian vui liam a ni ang. Vawiin chawhma dar 10:30 ah a chenna in (Ramzotlang)a thlahna neih a ni ang a, chhun dar 12:00-ah Mizoram Baptist Kohhran Biak In, Ramzotlang, Serkawn-ah Vui inkhawm neihpui a ni ang.

Vui inkhawm hi Upa H. Zahmingliana, Chairman, BCM Ramzotlang-in a kaihruai ang a. Rev. CL Malsawma, Bialtu pastor, Serkawn Pastor Bialin a vui ang,  Associate General Secretary Rev. Dr. K. Lalrinthanga'n BCM aiawhin a chanchin a sawi ang. Upa V. Lalrinmawia, Secretary, BCM Ramzotlang-in a chanchin Ramzotlang Kohhran aiawhin a sawi bawk ang. Heng bakah hian chhungkaw lam atanga thusawi leh Zaipawl - Ramzotlang Kohhran zaipawl leh Serkawn Pastor Bial Zaipawl te an zai ang a. Rev. Lalbiaksanga, Associate General Secretary, Service-in malsawmna a sawi ang.

  A chanchin tlangpui

Rev. C. Rothuama hi Chawngthu hnam a ni a, Buarpui khuaah May 10, 1944-ah a  piang a, ft 5, 2½” a sâng a ni. A pa chu Dîngaihthanga a ni a, a nu chu Thangkhûmi a ni. An unau hi mipa 5 leh hmeichhe 2 an ni. April 10, 1958-ah khân Buarpui-a Châltui luiah Rev. Rokunga’n Baptisma a chantîr a. January 5, 1966 khân Hmingthanzauvi nên Buarpui Baptist Biak inah an innei a, Pastor Rokûngan a invawntîr.  Fapa 3 leh fanu 2 an  an nei.

A lehkha zirnate: 1953-1956     -   Serte Primary School. 1957-1959     -   Buarpui Middle School. 1960-1964     -   Lunglei Govt High School 1968-1972     -   L.Th. E.T.C, Jorhat 1976-1978     -   B.D.,  Serampore College,

Pathian thu a zir hmain 1965-1966 khân Sabual-ah Private Middle School-ah leh Private High School-ah zirtîrtu hna a thawk a. Sabual-ah chuan Presbyterian Kohhran-ah rawngbâwltu a ni. Kum 1966-1967-ah Sêrte kohhranah Sunday School Secretary hna a chelh. Kum 1967-1968-ah Buarpui khuaah TKP Secretary a ni bawk.

Rawngbawl hna a chelh tawhte:  1972-1974      -    Pro. Pastor, Lungsen Bial 1974              -    Lawngtlai Bazar veng Assembly-ah Rev. Dr. C.L. Hmingan a ordain. 1974-1976      -    Bialtu Pastor,  Lungsen Bial 1976-1978      -    B.D zirin Serampore College 1978-1983      -    Lawngtlai Bial, Lawngtlai 1983-1984      -    Buarpui Bial. Buarpui 1984-1997      -    Mission Field Director, Tripura 1997-2001      -    Executive Secretary Aizâwl 2001-2004      -    Director, Communication Dept. 2004-2005      -    BCM President 2004-2010      -    Lunglei Chandmari Bial, Chandmari 2010-2011      -    BCM President 2013-2014      -    BCM - Mission Board Committee Member

Rawngbawlna kawngah Pastor hnain a huam hrang hrangte hi a tuipui vek thei a. Mission hna lam hi a tuipui lehzual a ni. Nupui a neih hnuin fa nei lovin kum 7 an awm a, chumi hnuin fapa 3 leh fanu 2 an nei ta a. Pathianin hriselna a pe a, vanduaina leh lungngaihna nasa lutuk tâwk lovin pension hun thlengin an thawk thei a, an lâwm hle a ni. Tin, Pastor hna a thawh ve hnuah an dahna hmun apiangah lungawi takin a awm thei zêl a, Office lama hna an pêk pawh tui takin a thawk thei zêl a ni. Kum 2010-ah pensionin a chhuak ta a, Serkawn Ramzotlang-ah in leh lo neiin an awm.