G.S leh AGS Mission- Andaman-ah:

General Secretary - Rev.F.Ramdinmawia leh AGS i/c. Mission - Rev. Dr. C. Vanlaldika te chuan December 13, 2016 hian Andaman thliarkar-a kan Missionaryte tlawhin an kal dawn a, an tum ang a kal tluang a nih chuan ni December 16, 2016 hian Headquarters rawn rawn thleng leh hman tura beisei an ni.

E.S Lawngtlai - Tahan-ah:

December 11-12, 2016 chhûng khian Christian Mission Seminar, Tahan Myanmar-ah neih a ni dawn a. He Seminar-ah hian Resource Person-ah Rev. R.Lalbiakliana Eexecutive Secretary, Lawngtlai  chu an rawn sawmna chhangin a kal ang. Rev. R. Lalbiakliana hi a nupui Pi Dr. Irene Colbert-in a tawiawm ang.

Synod-ah BCM-Palai:

Kum 1985-a PCI leh BCM ten inpalai tawnna an neih tawh loh hnuah, kum 31 zet a kal liam ta a. BCM Assembly 2014 chuan Synod nêna inpalai tawn leh tawh turin a rêl a. Synod lam pawhin rem an tih thu leh an inkhawmpui rorelna sang (Mizoram Synod Inkhâwmpui)- December 6-11, 2016 a Durtlang Biak Ina neih mêkah a palai tîr tura an rawn sawm angin Rev.Dr.C.Vanlaldika AGS i/c Mission leh Upa S.Hmingthanga, Luangmual, Aizawl te chu BCM aiawhin an palai mek.

Mamit Kohhran Silver Jubilee-ah Pastoral Coordinator:

Mizoram Baptist Kohhran, Mamit chuan ni December 8, 2016  hian kum 25 (Siver Jubilee) an tlin lawmna an nei dawn a, Headquarters atangin Rev. V.Vanlalchhunga, Pastoral Coordinatorbakah Lawngtlai Area Baptist Choir leh Nl.Lalhlumawii ten hmanpui bawk ang.

MSEU Spirituals Convention-ah MTKP Organiser:

Mizorama College leh Higher Secondary School hrang hranga zirlaite rawngbâwla inzawm khâwmna, Mizoram Students’ Evangelical Union (MSEU) chuan December 8-9, 2016 chhûng hiân Biak In Electric Vêng Biak In, Lungleiah Spiritual Convention an nei dawn a. He intawh khâwmnaah hian Rev Lianchhûnga Khiangte, Organiser, MTKP  chu speaker a ni ang.

Chakma Baptist Church (CBC) Assembly 2016:

Chakma Baptist Church (CBC) chuan  December 8-11,2016 hian Kawrpuichhuah-ah Assembly an hmang dawn a,  Zrtawpni leh Inrinni-ah Rorelna neiin, zan lamah vantlang inkhawm neih thin a ni ang. December 11, Pathianni-ah CBC hnuaia Pastor hmasa ber Rupentu Chakma (BD) chu ordained a ni ang. CBC Assembly hi Rev. A Zohranga, Chakma Mission Director-in a hmanpui ang.

JBS-in Valedictory Service  hmang dâwn:

Jubilee Bible School, Serkawn chuan December 15, 2016 chhun dar 12.00 khian Serkawn Biak In-ah Valedictory Service an hmang dâwn a. He hun hi Rev.R.Zohmingliana AGS/ i.c Service in a hmanpui ang. Lunglei khawpui chhunga Tualchhung Kohhran hruaitute leh Kohhran mi-puit a thei apiang tel turin an sawm bawk a ni.

Evangelism Programme: #Khamrang Kohhran (Lengpui Bial)-ah Salvation Camping – Speaker : Rev. C. Lalremmawia, Bialtu Pastor hman a ni. #Venglai Kohhran, Lungsenah camping - Speaker : Upa Zothankhuma Hrahsel, Evangelistic Team te hman an ni. #Zion Kohhran, Lunglei camping - Speaker : Pi Vanlalmawii, Ebenezer Ministry Team. #Phairuangkai khawtlang - camping -  Speaker : David H.Lallawmkima Evangelical Revivalistic Ministry. #Lungsenah Kohhran - Camping -  Speaker  : Rbt. PL.Sanglura Invaders for God. #Darngawn Kohhran - Camping - Speaker  : Upa H. Sangliantluanga, Jehova Jire Ministry Team. #Ramlaituiah Kohhran - Camping nei mêk, Speaker  : Upa RL Thianghlima, Mizoram Evangelical Ministry. #Zotlang Kohhran, Aizawl - Crusade - Speaker  : Rev.F.Sangvela