Rev.David Minton (Pu Zomawia)[/caption]
Kan Zo-sap missionary, Rev.FJ Raper-a fapa Pu Zomawia(1937-2014) chu kum 77 mi niin May 12 (Thawhtanni) khan vui liam a ni ta. Pu Zomawia hi Zosap missionary tu leh fate zingah Mizoram tana thawhhlawk em em a ni a. Hun rei tak natna khirh takin a tlakbuak hnuin thin cancer avangin London-ah April 4 khan a thi a, ni 37 hnu, May 12, 2014 khan a chenna khua leh lawina kohhran, London Road Baptist Church, Lowesoft, U.K ah vui a ni. Pu Zomawia sunna hi a lawi hmasakna ber Kohhran, Serkawn Biak Inah May 11, 2014 pathianni inkhawm-ah hmangin, a chanchin sawi a ni a. May 12, 2014(Thawhtanni)-ah BCM Headquarters Office Staff te chuan Sap Upa leh Pu Buanga Hall, Serkawn-ah ama puala hun hmangin sunna neih a ni bawk.
A nu leh Pa rawngbawlna:
Rev. David Minton (Pu Zomawia) Pa Rev. FJ Raper (Pu Reia) hi Engineer niin BMS Missionary-ah a hna bansanin a lut a. Kum 1932-ah a Florence Rice (Pi Reii) nen Mizoramah Sap Upa leh Pu Buanga te hmun ruak hnawhkhat turin an rawn chhuak a. Sap Upa leh Pu Buanga te hna thawh rawn chhunzawmin Kohhran enkawl chu a hna pui ber a ni a, Bible School-ah a zirtir bawk. Khaw tam takah a zinin Evangelism hna a thawk bawk a. Engineer a nihna chu hmang tangkaiin Kohhran building leh Quarter engngemawzat a sa bawk a ni. Mizoram chhim lama la awm lo, Printing Press a din a, lehkhabu dawn (Bookroom) te siaminin vawiin thlengin Baptist Printing Press leh Bookroom hi rawngbawlna peng pawimawh tak a ni chho ta zel a ni. Tin, Mizoram tana a thiltih langsar zingah a thawhpui Pu Kara (Rev. Carter)nen Mizoram Scout an din nghe nghe a ni.
Pu Zomawia Chanchin tawi:
Pu Zomawia nu leh Pate Mizorama an awm hun lai, 1937 hian Pu Zomawia hring turin Shillong-ah an zu kal a, July 14, 1937-ah a piang a, Mizoramah a naupan hun chhung zawng a awm a. School a kal theih hnu-ah Sap ram lamah lehkha zirin Pastor a zir zawh hnu-ah, Oxford University atangin English, French leh Latin ah te Master Degree a lak hnu-ah McMaster University, Ontario, Canada atangin Ph.D zovin Doctorate Degree a la leh a ni. Kum 1962-1964 ah Wollaston Baptist Church ah Pastor hna a thawk a, hemi hnu atang hian Pastor hna hmun hrang hrangah thawk kualin a hun tam tak chu Theological Institution-ah te visiting Professor hna a thawk bawk a ni. A pension (Retired) hnu-ah pawh Pastor ni chungin Blundeston, UK ah Chaplain hna te a thawk chhunzawm leh a ni. Pu Zomawia hian a nupui Christine Anne Hindley leh a fate pali (mipa 2, hmeichhia 2) a kalsan a ni.
Mizoram leh BCM tan mi tangkai a nih dan:
Mizoram Gospel Centenary 1994-ah Mizoramah rawn zinin a nu leh pa rawngbawlna hmun leh a naupan laia a lo chettlatna chuan a rilru a ti thar em em a.. hemi atang hian Mizoram Baptist Kohhran nen in zawmna thuk tak neiin ama sensovin vawi tam tak (kum tin deuh thaw) a rawn chhuak a. AICS-ah Visiting Professor anga thawkin lawmman engmah phut lovin rei tak tak chamin vawi 10 vel zet a rawn chhuak a ni. Chu main i lovin, BCM R&D hnuaia puanthui training te tana puanthui khawl sem tur kum engngemaw zat min tum sak mektu a ni a, Malaria dona kawngah pawh a thawhhlawk hle, thingtlang pilril tak tak-ah te kalin mizo khualpang zin ang maiin mizo chhungkua leh khawtlangah a teihawi peih reng a ni. BCM-in BES (Tuna BHSS Junior Section)kan din chhoh laiin English Class te lain English zir dan (Voice record) nen a buatsaih sak a, BHSS-ah pawh naupangte a zirtir bawk a ni. Mizo mipuite leh Kohhran a ngaina-in a hmangaih em em a, a theihna leh sum leh pai tam tak sengin vawi engngemawzat a rawn chuangchhuak a ni.
Hmeichhe dinhmun dawmkanna kawngah a taka thawktu leh veitu a ni a. Nl. K. Rohmingliani (Arovi,)Lunglei Ramthar chu AICS-a BD a zirzawh hnu-ah London-ah hruai thlain Master Degree a zir theih nan nasa takin a pui a, ama sensovin a zir chhuah hnu-ah Pastor atan Ordained a lo ni ta hial a ni.
Pu Zomawia thihna hi Mizoram Baptist Kohhran ang pawhin channa nasa tak a ni a. BMS Missionary ho te tu leh fa kan hriat phak loh tam tak an awm laiin a ni hi chuan BCM hi a rawn zawm tha em em a, BMS Missionary Mizorama lo kal tawh te hi a tam zawkin Chatuan ram min pan san tawh a, Pi Zomawii, Pi Sangi leh Pu Tuck-a chiah tunah hian chak lo takin an la dam a. Pu Zomawia hi anni ho aiawha Mizoram rawn fang leh thintu a ni ti pawhin a sawi theih ang.
Mizoram Baptist Kohhran chuan Pu Zomawia thihna hi channa nasa tak-ah kan ngai a, amah hi kan ngaihlu a, kan hmangaih bawk a. Mizo te min hmangaihna leh Kohhrante min duhsakna avanga a hnathawh tam tak hi kan hre reng dawn a ni. A kalsal, a nupui leh fate, a lawina Kohhran Lowesoff Baptist Church te thinlung takin kan tuarpui a, an tan kan tawngtai sak a ni.
