Mizoram Baptist Kohhran Rorelna Sang ber, BCM Assembly Farmveng-a neih mek chu Rorel Nikhatna hun hmasa lamah President Elect thlanna neih nghal a ni a, Rev. Lalthangliana Hnamte chu BCM President Elect atan thlan tlin a ni. A chanchin tlangpui:

Rev. Lalthangliana Hnamte hi a pa Hrângkaia Hnamte a ni a, a nu Chalchâni Chhakchhuak a ni a, Chêngpui khaw chhuak ve ve an ni. October 12, 1948-ah Thingsai-ah a piang a, unau mipa 7 leh hmeichhe 2 zînga a upa ber atanga pathumna a ni. A nu hi Pi Zirtîri-te tirha Thingsaia Hmeichhe Sikul dintu a ni a. Thingsai khuaa seilian a lo ni ta a ni. Bualiangi Thlaucheu hnam Thingsai khua nen May 11, 1978-ah Rinna Kohhran Thingsai Biak Inah Pastor Dârchhûman a inneihtîr a. Fapa 1, fanu 3 an nei.

Zirna lam : Primary leh Middle School Thingsai-ah a zir zo. Class VII & VIII St. Paul’s High School, Aizâwl-ah a zir. Ram buai avângin 1967-ah Shillong-ah zir zawmin 1969-ah St. Anthony’s High School atangin Matric a pass a. St. Edmund’s College-ah zir zawm lehin 1975-ah B.Sc a pass a. Deputation-in B. Ed Aizâwl-ah a train a, practical teaching-ah Outstanding (O) grade a hmu a. 1991-1994 chhûngin Serampore College-ah B.D. zirin chhûngkuain an awm. Serampore College-ah hian College zirlai tha chawimawina Master’s Prize a dawng.

Khawtlâng rawngbâwlna lam: Shillonga a awm laiin Sikeisen Club an din a, Mizo thâl Favang Kût Club lian berah President a ni a, kum 3 chhûng best club an ni. Thingsaiah

YMA Branch Assistant Secretary (1983), President (1984), Tuiphai Group YMA Assistant Secretary (1984) te a lo ni tawh. Hla phuah leh zai leh rimawi lam khawvêl a tuipui hle a. Love song leh Hla lênglâwng 30 vêl a phuah a. Zoram puma sak lâr hlawh tak tak a awm nual. Pathian fakna hla 52 vêl a phuah bawk a. Mizoram-ah Pastor, Pathian hla phuah tam ber, tiin Upa C.L. Bika Lunglei Bazâr vêng chuan a lehkhabu “Chuan Tlanna” tihah a ziak.

Pastor a nih hmaa rawngbâwlna: 1963 kum tâwp lamah Thingsai-ah Pastor Thangmuran Baptisma a chantîr a. 1975-ah Shillong-ah a piangthar a. A piangthar hi a extreme hle a, Kohhrante lakah pawh harsatna a tâwk hial. Thingsai-ah KNP Convener leh Zaipâwl Conductor te, TKP President te, Bial TKP Vice-President-te a lo ni tawh a. 1977 April-ah Baptist Kohhran chhuahsanin Rinna Kohhran-ah a awm a. 1985 May-ah a sorkâr hna bânsanin Lunglei-ah Rinna Kohhran General Secretary full time-a thawkin office a luah a. March 8, 1987-ah Pastor atân Rev. Dârchhûman a nemnghet a. September 16, 1990-ah Mizoram Baptist Kohhran-ah kîr lehin Pastor-ah pawm a ni a. BCM Pastor a nih hnua a rawngbâwlna: 1991-1994 - Serampore-ah B.D. a zir. 1994-1999 - Bialtu Pastor, Lawngtlai N Pastor Bial 1999-2001 - Bialtu Pastor, Sêrchhîp Bial 2001-2007 - Executive Secy, Lawngtlai Area (term 2) 2007-2010 - Director, Christian Education Dept. 2010 - Co-ordinator, Pastoral Dept.

2011-2013 - JBS

Kum 2013 khan pension-in a kal ve ta a, Lunglei Zotlang-ah an chhungkua-in an in bengbel ve ta a ni.

Rawngbâwlnaa a tuizâwng chu Lal Isua chhandamna Chanchin Tha sawi a ni. Rimawi chi hrang hrang hmanga Pathian fak nuam a ti êm êm a, zai thiam te, rimawi tum thiamte hi a ngaihsânte an ni. Zaipâwl tha neih te, Biak In zai tihnawm leh tih hmasâwnte hi a vei zâwng leh a rualawh fona a ni thîn.

Ephesi 2:1-6 thu hi a piantharna Bible chang a ni. Kristian Hlabu No. 270-na ‘Chhandamtu chatuan nun nan’ tih hi a hla duh ber a ni.