June 5, 2025 (Ningani) khan Pi Lalrinpuii, Hon’ble Minister for H&FW,SW&TA leh Tourism Dept. chuan Mizoram Universal Health Care Scheme Christian Hospital, Serkawn-in a zawm  avanga lawmthu sawina hun hman pahin a tlawh.

Pi Lalrinpuii chuan BCM hotute leh Hospital hotute hmalakna avanga Mizoram Universal Health Care Scheme, Christian Hospital, Serkawn-in a zawm hi  sawrkarin lawmawm a ti hle a, damlo leh mi harsate tan malsawmna a nih thu sawiin, Hospital dangte tan pawh entawn tlak a tih thute a sawi bawk. Tin, security atan nuai 50 pawh pek tura peih vek a nih tawh thu sawiin pawisa pawh pek vat a nih tur thu a sawi bawk.

General Secretary, Rev. Dr. H. Lalthlamuana’n MUHCS hi BCM chuan ngun taka ngaihtuahin sawrkar thawhpui hi kohhran tih tur ni a an hriat avangin Risk tam tak awm mahse fimkhur tak chung leh hlauthawng deuh chunga zawm an ti tlu ta a nih thu a sawi bakah BCM hi chuan mipui rawngbawlna a ngaihpawimawh vangin mipui rawngbawlnaah an ngaih bawk avanga zawm an nih thu a sawi bawk. AGS Service Rev. Vanlalmuankima pawhin Health Minister-in Hospital a lo tlawh avanga lawmthu sawina a nei bawk.

Upa Dr. B. Laldinliana Director, Medical & Health Department-in MUHCS zawm chungchangah  Hospital hotute chuan anmahnia thu tlukna siam harsa an tih avanga BCM hotute  rawna BCM hotute thu tlukna  anga zawm an nih thu a sawi bakah BCM hotute inhuamna leh thawhpuina avangin lawmthu a sawi a.

Sawrkar lam nen hian hospital hi chu thawkho lo thei kan ni lova, MUHCS chungchangah chauh lo pawh thil dang mamawh tam tak he hospital hian a nei a, chungte pawh chu a ṭul dan a zirin Minister hnenah an mamawhte an thlen a ṭul hun a la awm dawn a, chung hunah pawh chuan a ţul anga hmalak pui zel turin a sawm.