Tunkar Pathianni, January 31, 2016 hi Phar pual Pathianni (The Leprosy Sunday) a ni a.  He Ni hi Mizoram Baptist Kohhran chuan urhsun taka hmangin Kohhran tinah Chawhma Inkhawmah hemi pual hian inkhawm Progamme siam a ni ang. Headquarters atanga thupui thlan sa ‘Ka duh e, lo thianghlim tawh ang che.’ (Matt. 8:3) tih a ni ang.

‘Phar pual Pathianni’ hi 2006 Assembly rel angin January Pathianni hnuhnung berah hman thin a ni a. Kumin 2016-ah hian Calendar-ah leh Ni Pawimawh Bu-ah January 24, 2016 a hmang turin tarlan ni mahse January 31-ah hman tur a ni. Kum danga kan tih thin angin Inkhawm thawhlawm hi TLM pual a nih avangin Headquarters-ah thawn tur a ni e.

.....................

THUCHAH

-Rev. Lalzarliana, TLM Promotional Secretary

Lal Isua khawngaih phâr chanhai leh riangvaite tana kan rawngbawlpui zawng zawng te, (Leprosy Sunday) kan lo thleng leh ta reng mai a. He ni min hruai thlengtu leh phârte puala rawngbawlna kawng min la hawnsaktu Pathian hnenah chuan lawm thu awm rawh se. Vawiin Phâr Pual Pathianni a kan thupui chu phâr pakhatin Lalpa, i duh chuan minti thianghlim thei e, a tih laia Lal Isuan ‘Ka duh e, lo thianghlim tawh ang che.’ (Matt. 8:3) a tih kha a ni.

Eng Kohhran mahin  a hrana hmalakna a la neih loh Phârte puala rawngbawlna kawngah hian BCM  hian thawhpui tha tak mai a nei a, The Leprosy Mission (TLM) rawngbawlna hi a ni. BCM  leh TLM hi phar chanhai leh riangvaite tan hun rei tak lo thawk dun tawhin, Mizoram chhunga hma latu pawimawh ber a la ni zel a. Chu chauh ni lovin  Pastor thawk lai hial theh chhuakin TLM tan theihtawp a chhuah a ni. Chutiang anih avang chuan TLM tan chuan BCM  hi a hlu em em a, rawngbawlpui mai ni lovin innghahna tlakah a ngai a ni.

Kan hriat tawh thin angin TLM hi khawvel pum huapa phârte tana rawngbawltu lian ber a ni a, London leh Delhi-ah te hmunpui neiin, Mizoramah pawh Aizawlah hmunpui a nei a. Mizoram pumpuiah Chapter 24 lai a lo awm ve ta a ni. Heng bakah hian Unit eng emaw zat neiin Kohhran tam takah Promoter thahnemngai tak tak an awm teuh bawk a ni.

Hetih mek lai hian Zoram chhungah phâr pual rawngbawlna la hmel hriat lo mi eng emaw zat Kohhran mipuite zingah kan la awm ve tho mai a, hma lakna tur a la tam hle a ni. Kum tinin Delhi Headquarters atangin kan kum khat thawh chhuah tur target min rawn tuk chu Chapter, Unit leh Tualchhung Kohhran hrang hranga Promoter ten theih tawp chhuahin  tihhlawhtlin tumin hma an la thin a ni. Phârte an lo thianghlim a, Krista an lo neih ve theih nan heng sum te hi Delhi lamah thawnthlak zel a ni a. Heng thilpek tlingkhawm te hi phar ten an taksa leh thlarau dam nan an lo hmang ve thin a ni. Kum tina pharte tana i phal ang tawk i pek thin hi a thlawnin a luangral lova, a tak takin phâr ten an taksa leh thlarau dam nan an hmang ve thin a ni. Aw le, vawiin thawhlawm pawh hi phâr chanhai leh riangvaite tan phal taka inpek leh theuh kan han ngen a ni e.

Irish tlangval Welesly Cosby Bailley-a zirtirtu, Missionary tura inbuatsaih mek chuan India rama phar khawngaih thlak em em, enkawltu tha nei lova kawtthler leh an dahkhawmna hmuna awmte a hmuhin a khawngaih em em a. Chung mite taksa leh thlarau  chhanchhuah aia rawngbawlna ngaihpawimawh tur awm bikin a ring lova, phârte tana rawngbawlna chu kum 1874 ah India ram Ambala (Chung hun laia Punjab)-ah harsa takin bul a tan a. Tunah chuan khawvel hmun hrang hrangah Kohhran pawl hrang hrang 100 zet kan thawkho ta. Mizoramah chuan 1985 atang khan TLM rawngbawlna hi Promotional & Suppport hna thawkin tan a ni.

1. TLM hi India ram atanga tannin khawvel ram 51-ah rawng a bawl ta. India ram phâr tamna State 10-ah Hospital, Mercy Home, Vocational Training Centre (VTC), Community Base Centre (CBC) etc. hmangin rawng kan bawl mek.

2. He khawvel pum hi Region 3- Afrcia Region, East Asia Pacific leh South Asia Region (India etc) ah then a ni. Internatioanl Headquarter London a ni. Pharte enkawlna leh an tana rawngbawlna Project 182 a nei. Khawvel hmun hrang hrangah thawktu 1600 vel an awm a ni.

3. South Asia Region Headquarters chu New Delhi ah a awm a, Noida (UP) a TLM Media Centre a awm a, Zonal Office 1 a awm bawk. Tin, North East India Region rawngbawlna bikah Aizawl chu Headquarters niin India rama phârte tanpuina atan hma lak mek a ni.

4. India rama hi khawvela phar tam berna ram a ni a, kum tinin phar vei thar 130000t140000 hmuh chhuah thar ziah a la ni a. India ramah hian TLM-in phâr Hospital (damdawiin) 14 a nei mek a. Phâr dam leh te eizawnna tur zirtirna Vocational Training Centre (VTC) 6 a nei a, an dam tawh hnu pawha an chhungte duh loh phâr enkawlna  (Mercy Home) 5 a nei mek bawk.