Tunkar Pathianni, January 25, 2015 hi Phar pual Pathianni (The Leprosy Sunday) a ni a. He Ni hi Mizoram Baptist Kohhran chuan urhsun taka hmangin Kohhran tinah Chawhma Inkhawmah hemi pual hian inkhawm Progamme siam a ni ang. Headquarters atanga thupui thlan sa “Heng ka unau te berte zing a mi pakhat chung a in tih chu ka chunga ti in ni”. (Mathaia 25:40). tih thu hmangin thuchah sawitu-in thuchah a sawi ang a, thupui thlansa hmangin tawngtairualna neih a ni bawk ang. Hemi ni pual Inkhawm thawhlawm pawh Phar Pual atan serhhran a ni ang .
Tawngtairual thupui te:
- Delhi Headquarter leh Office dang hmun hrang hrang a thawktute leh Mizoram committee hruaitute leh Office a thawktute tan. TLM-ah hian thawktu 1000 chuang an awm mek a ni.
- Phar Hospital 16 leh Mercy Home, Vocational training centre leh media centre etc-a Doctor, Nurse leh Counselor-ten hmangaihna tak tak nen rawng an bawl theih nan.
- Pharte Lal Isua hnena hruai an nih theih nan leh taksa leh thlarau damna an chan theih nan.
- Thlarau bo dang ang thova Lal Isuan a ngaihpawimawh an ni tih kan hriatthiam theih nan.
..............................
Phar Pual Pathianni lo chhuah dan
Kum 1943 atangin Mizoram Baptist Kohhran chuan phar tanpuina hi kan lo pe tawh thin a. Assam Christian Council (ACC) kan tih, tuna North East India Christian Council (N.E.I.C.C) kan lo tih tak hian Assam ram chhunga Phar ho hmun hrang hranga mite tanpui a duh a. 1947-ah Assam Christian Council zawmtu kohhrante chuan September thla chawlhni hmasa ber apiang hi Pharho tawngtaisak nan hmang ila, chumi ni-a thawhlawm pawh chu anmahni tanpui nan pek nise tiin a rel a. BCM pawh A.C.C.-ah member anih avangin he ni hi kan hmang ve ta a, Kohhran Calender-ah pawh kan lo dah ta a ni. Thawhlawm tling khawm chu Assam huam chhunga (N.E.I.C.C. huam chhung) Phar enkawlna Damdawi Inte hnenah a sem thin a, chutiang chuan hun rei tak kan lo ti tawh thin a ni.
Leprosy Mission (TLM) nen kan thawhho hnu hian TLM hi India ram leh khawvel hmun hrang hranga Phar Damdawi In enkawltu an nih avang leh kum 20 dawn lai chu a hotu ber (Promotional Secretary) chanvo kan Kohhranin kan chan tak avang hian hemi nia kan thawhlawm tlingkhawm te chu The Leprosy Mission-ah hian pek a ni thin. A hun thuah hian hun rei tak chu January Pathianni vawi 4-naah kan hmang thin a; mahse TLM hian January Pathhianni hnuhnung berah an hmang si a. Eng emaw changin a hun hi inrual loh chang a awm thei tih hriain kum 2005 Assembly chuan TLM lamin an hman hun January Pathianni hnuhnung berah hman ni tawh rawh se, a ti a. Chutiang chuan kum 2006 atang khan kan hmang ta zel a ni.
...................
Thuchah (Chhiar tur)
A.D. 2000 zet liam taa kan Lal Isuan ‘Pharte tithianghlim ula’ tia miten an ngaihsak loh, thinhrikte a khawngaihna leh ngaihsakna thu kha vawiin thlengin a la danglam lo va, Bible-ah hian chiang takin a la inziak a ni. Khawvelah hian phar natna a awm chhung chuan kan Lalpa thusawi hi a la pawimawh reng a, ti tura min tih ang tak hian kan thawh zel pawh a tul dawn a ni. Lei leh vana thuneitu Isua Krista khawvela a lo kal hma kha chuan, pharte chan kha a chhe em em a, tuma ngaihsak an hlawh lo. Ngaihsak a hnekin “An chan chu daipawn” a ni. Mahse chhandamtu Isua chuan chung mite dinhmun chu rawn thlak danglam a duh a ni. A thu sawi chu a mah ngeiin ataka thawkin pharte a tithianghlim ta a ni.
Tichuan Lal Isua zirtirte khan rawng an bawl tantirh khan Isua rilru leh thuchahte “damlo te tidam ula, mitthi te kaitho u la, Pharte ti thianghlim u la,” a tih chu ngaihpawimawh bik nei lovin hlim takin an fehchhuahpui a. Mite rilru pawh luah ve ngai lote khan an lakah mi chan ang an lo chang ve ta a, ngaihsak hlawh ngai loten ngaihsak an lo hlawh ve ta a. Nazareth Isua, khawvel chhandamtu chu khawvelah a lo kal a, an zingah a awm tlat a ni.
Lal Isua zuitute, a rawngbawltute zingah hian Lal Isua hi a la awmin, Lalna leh thuneihna a la chang zel em ? A la awm a, a la lal zel a nih chuan a ngaihpawimawh rawngbawlna chu kan ngaipawimawh tur a ni. Chuvangin phar tam tak khawvel hmun hrang hranga awm mekte chhanchhuah hna chu kan kovah a innghat tlat a ni. India ramah hian kum tinin phar natna vei thar mi 150000 vel la hmuhchhuah belh ziah a ni a, hmuhchhuah loh leh inthup pawh engemaw zat an awm ngei ang. Chung mi te chu an taksa, rilru thlarau na leh boral tur te an ni. Chhandam a an awm theih nan Lal Isua ringtute hian mawh kan phur a, an pan te tihdam a nih theih nan, an tan kan theihna te kan hlan a tul takzet a ni.
India ram hi phar tamna ber niin, khawvel a phar zawng zawng 60%- 70% an awm a. An sakhawpui leh chipuiten an ngaihsak lova, an chhung ten an hnawtchhuak a, an dam hnuah pawh an duh lo va, anmahni enkawlna hran siam a ngai hial a ni. India rama phar enkawltute chu kristian pawl vek kan ni. The Leprosy Mission hi pharte enkawltu lian ber leh thawhhlawk ber a ni. An chanchin kan sawi vek seng lo, tanpui an ngaihzia pawh kan sawi seng lo. Tin, an chanchin hriat a, an tawrhna rapthlak tak ngaihthlak ringawt pawh a tawk lovang. An dinhmun hrechiang tur te, an mahni tanpui emaw khawngaihna lantir turin an mahni pawh kan hmu pha hek lo. Amaherawhchu hei hi kan ti thei a ni. Lal Isua thupek zawmin an taksa, rilru leh thlarau na tidam turin pharte i tithianghlim ang u. Thilpek leh tawngtaiin tan i la ang u, tiin Lal Isua hming leh phar chanhai leh riangvai te aiawhin kohhranhote kan ngen tak meuh che u a ni.
The Leprosy Mission Rawngbawlna.
Irish tlangval Welesley Cosby Bailleya zirtirtu, Missionary tura inbuatsaih mek chuan India rama phar khawngaih thlak em em, enkawltu tha nei lova kawtthler leh an dahkhawmna hmuna awmte a hmuhin a khawngaih em em a. Chung mite taksa leh thlarau chhanchhuah aia rawngbawlna ngaih pawimawh tur a awm bikin a ring lova, pharte tana rawngbawlna chu 1874-ah India ram Ambal-ah harsa takin bul a tan a. Tunah chuan khawvel hmun hrang hrangah kohhran pawl hrang hrang 100 zet kan thawkho ta. Mizoramah chuan 1985 atang khan TLM rawngbawlna hi Promotional & Support hna thawkin tan a ni.
Khawvel leh India rama chanchin thenkhat.
1. TLM hi India ram atanga tanin khawvel ram 51-ah rawng a bawl ta. India ram phar tamna State 10-ah Hospital, Mercy Home, VTC leh CBC etc hmangin rawng kan bawl mek.
2. Khawvel pum hi Region 3- Africa Region, East Asia Pacific leh South Asia Region (India etc)-ah then a ni. International Headquarter-London a ni. Project 182 a nei. Thawktu 1600 vel an awm.
3. South Asia Region Headquarters chu Delhi ah a awm a, Zonal office 2 a awm bawk.
4. India ramah TLM-in phar hospital (damdawiin) 16 a nei mek. Phar dam leh eizawnna zirtirna Vocational Training Centre (VTC) 6 a nei mek a, an chhungte duh loh enkawlna (Mercy Home) 5 a nei mek bawk. Princess Diana sum thawh hmangin Research Centre Noida-ah din a ni. NEI Office hmasa ber Aizawl-ah a awm a, Nagaland-ah 2010 khan hawn a ni bawk.
Kum tina India rama thawh dan.
TLM hospital-ah te hian kum tinin mi 5000 aia tam enkawl ziah a ni a, phar dam leh mi 450 lai an eizawnna atana chhawmdawlna pe a enkawl reng (Rehabilitate) an ni. Phar dam lehte tana zirna buatsaih VTC 6-ah student 1000 velin an zir reng. Phar natnain taksa peng a tih chhiat sak mi 1300 leh mit chhia mi 3600 kum tinin an zai sak bawk. Phar naupang enkawltu nei lo1335 vel kum tinin an zirna ngaihtuah sak thin an ni. Phar dam leh chenna nei lote tan chenna in 200 vel sak sak ziah an ni. Micro cellular rubber hmangin kum tinin pheikhawk tam tak siam sak thin a ni. Pharten Lal Isua an neih theihna turin Hospital leh centre tinah counselling neihpui reng an ni.
TLM Mizoramah.
TLM Mizoram Headquarter office Aizawl leh Sub-office Lunglei-ah a awm.
1.Thawktute:
i. Rev. Lalzarliana Promotional Secretary, Aizawl office.
ii. P.Lallawmawma Promoter. Aizawl Office.
iii. Laldinpuia Organiser/Office assistant, Aizawl office
iv. T. Vanlalremruata Promotional Co-ordinator, Lunglei office
2. TLM Mizoram Committee a awm a, Campaign & Ladies Wing Committee tete bakah Chapter 14 leh Unit engemaw zat a awm. Promoter thahnem tak kan nei a, kohhran pawl 6 kan thawkho.
3. Delhi Headquarter atanga target an siam ti hlawhtling turin Unit, Chapter leh Promoter-ten nasa takin an thawk a, sum te hi Delhi Headquarter-ah pharte enkawl nan thawn thlak thin a ni.
4. Zaipawl tha tak, TLM Choir kan nei a, kohhran pawl hrang hrang atangin thahnemngai em em in hma an la a, pharte tana campaign tu tha tak an ni.
