Tunkar Pathianni, January 31, 2020 hi “Phar pual Pathianni” (The Leprosy Sunday) a ni a. Mizoram Baptist Kohhran chuan he ni hi kum tinin urhsun takin a hmang thin a, Kumin Phar pual Pathianni thupui atan “I duh chuan mi tithianghlim thei e” (Marka 1:40-41) tih a ni.
Covid -19 hrileng avangin Kohhran ni pawimawh hrang hrang leh Programme te hman hleih theih a la nih loh avangin, Phar Pual Pathianni pawh hi Biak In lamah hman theih a ni dawn lova, Kohhran hoten mahni chhungkua theuh ah a remchan anga hemi ni puala hun hmang theuh turin Kohhran hruaitu ten min ngen a ni.
Phar Pual Pathianni Programme hi TV lama pek chhuah turin buatsaih a ni a, KHAWNVAR Programme LPS leh ZONET ah te Pathianni zan dar 8 ah pekchhuah a ni ang a, heng bakah hian YouTube: BCM Channel -ah pawh hemi hun-ah tho hian dah chhuah a ni ang.
Phâr pual Pathianni (Leprosy Sunday) hi kum 1943 atangin BCM chuan a lo hmang tawh thin a. Kum 1947-ah Assam Christian Council chuan a huam chhunga Kohhrante pual in Phâr pual Pathian ni a siam a, he mi nia thawhlawm pawh The Leprosy Mission tanpui nana pek thin a ni.
Kum 2006 Assembly-chuan Phar pual Pathianni atan January Pathianni vawi 4-na kan hman thin hi, January Pathianni hnuhnung ber-ah hman ni ve tawh rawh se” a tih angin, Khawvel puma Pharpual Pathianni an hman rualin January Pathianni hnuhnung berah hman a lo ni ta a ni. Hemi nia thilpek tlingkhawm hi BCM pawisa luh dan pangngaiin BCM Headquarter’s office-a chhun luh thin a ni bawk.
Related Links: Leprosy Mission (Khawnvar Inleng) Phar Pual Pathianni thuchah - Rev. Dr. Lalzarliana
