Mizoram Baptist Kohhran Rorelna sang ber – BCM Assembly vawi 120-na Hnahthiala neih mek chu , Vawiin-ah Rorel nithumna an hmang mek a. Naktuk, Pathianni chawhma inkhawm hi Ordination Service atan hman a ni ang a. Hetah hian Pro.Pastor kum thum lo thawk tawh leh Pro.Pastor Exam hrang hrang paltlang tawh mi 7 Ordain an ni dawn a ni. BCM President Rev. Lalthangliana Hnamte-in heng Pro.Pastor zo te hi Minister atan a nemnghet ang a, Lawngtlai Area Choir leh Hnahthial ‘N’ Bial,ten Pathian fakna hla an sa ang.
- T.Vanlalremruata- Paithar Bialah a awm ang
- Habert Rorelliana Sailo - Vathuampui Bial-ah a awm ang
- P. Lalroluahpuia - West Phaileng Bial
- Ramnghakmawia Hnamte - Damdep Bialah a awm ang
- B. Rosangzuala - Khawzawl Bial
- P.C Lalrinawma - Lungsen Bialah a awm ang
- LH.Lalmalsawma - Lungchem Bial
Pathianni chawhnu dar 1:30-ah Sacament Inkhawm a awm ang a, Rev. K.Lalnunsanga'n Lalpa Zanriah a buatsaih ang, Zaipawl Aizawl Area Choir leh Thingsai Pastor Bial Zaipawl te an zai bawk ang.
Pathiani zan dar 6:30-ah Assembly kharna Inkhawm leh BCM Hruaitu thar hlanna Inkhawm awm ang a, Rev. Lalthangliana Hnamte, President-in Inkhawm kaihruaiin Hruaitu thar hlanna a nei nghal ang a, General Secretary, Rev.H.Lianngaia'n Rorel Report tlangpui pein President kal chhuak- Rev. C. Ngurhnema'n "Kristian nun chu - 'Pathian leh a Kohhran tana Nun a ni” tih thupui hmangin thuchah a sawi ang. Hemi zan hian BCM Choir , Bawngkawn Pastor Bial , Republic Vengthlang Pastor Bial leh Hnahthial ‘S’ Pastor Bial Zaipawl ten Pathian fakna hla an rem ang.
