Mizoram Baptist Kohhran Rorelna sang ber – BCM Assembly vawi 121-na Lunglei Chanmari Biak Ina neihmek mek chu , vawiin-ah Rorel nithumna an hmang mek a. Naktuk, Pathianni chawhma inkhawm hi Ordination Service atan hman a ni ang a. Hetah hian Probationary Pastor kum thum lo thawk tawh leh Pro.Pastor Exam hrang hrang paltlang tawh mi 5  Minister atan nemngheh (Ordain) an ni ang.Ordination Service-ah hian BCM President, Rev. H. Lianngia'n a nemnghet ang a,   BCM Choir  leh Siaha 'W' Pastor Bial zaipawl te an zai ang. Ordain turten Testimony tawi an sawi bawk ang.

Pastor/Minister atana nemngheh turte chu hengte hi an ni. 1) R.Vanlalfala 2) Vanlalnghaka Jongte 3) Lalhruaia Chenkual 4) Lalrammuana Poonte 5) K.Lalhmangaihzuala

Pathianni chawhnu dar 1:00-ah Sacament Inkhawm a awm ang a, ZD Rodingliana’n Lalpa Zanriah a buatsaih ang,  Zaipawl  -  Lawngtlai Area Choir     leh  Chanmari Pastor Bial Zaipawl te an zai bawk ang.

Pathiani zan dar 6:45-ah Assembly kharna Inkhawm leh BCM Hruaitu thar hlanna Inkhawm awm ang a, Rev. H. LIanngaia, BCM President-in Inkhawm kaihruaiin Hruaitu thar hlanna a nei nghal ang a, General Secretary, Rev. F. Ramdinmawia’n Rorel  Report tlangpui pein President kal chhuak- Lalthangliana Hnamte-in “Rinawmna – ‘Malsawmna Hnar” tih thupui hmangin thuchah a sawi ang. Hemi zan hian   Aizawl Area Choir ,  Lawngtlai 'E' Pastor Bial, Bazar Pastor Bial leh leh Chanmari Kohhran Zaipawl ten Pathian fakna hla an rem ang.