Vawiin, January 8, 2020 chawhma dar 10:30 khan BCM Hall, Serkawn-ah 'Pastor Thanzinga Chanchin' tih, a fapa Rev. Dr. CL Hminga, Serkawn ziak chu BCM General Secretary Rev. F. Ramdinmawia’n a tlangzarh.
Lehkhabu tlangzarh Inkhawm hi Pu Lalruatkima, Administrative Officer, BCM Headquarters Office in a kaihruai a. Rev. Vanlalmuankima, Bialtu Pastor Bazar Pastor Bial-in Pathian hnena inkawltirna hun serh a hmang a. Pastor Thanzinga fate pahnih - Pu CL Ruala leh Rev, Dr. CL Hminga ten thu an sawi a. Pi Bethsy Lalrinsangi leh Tv. Nghakliana Fanai ten fakna hla an sa bawk. Hun tawp ah Rev. H. Killuaia’n Malsawm tawngtaina hmang in lehkhabu tlangzarh inkhawm hi a khar.
He lehkhabu hi Rs. 100/- man ni in BCM Bookroom leh lehkhabu dawr hrang hrangah te ngaihven theih a ni ang.
Pastor Thanzînga hi BCM Pastor hmasa te zing ami niin, 1889-ah a piang a, Sêrkâwn-ah Sâp Upa (F.W.Savidge) in 1913-ah Baptisma a chantîr a. Kum 1923-ah nupui a nei a, fapa 3 leh fanu 3 an nei a ni. Kum 1915 atangin Kohhran Upa/ Presbytery member a ni a. Kum 1918-1920 (Kum 3) chhûng Tirhkoh hna a zir a. Kum 1920-ah Tirhkoh atân nemngheh a ni. Kum 1927-ah Minister (Pastor) atan nemngheh a ni.
Pastor Thanzînga hian Sunday School atangin ziak leh chhiar a zir a, Pastor ni thei khawpin a inzir chho zêl thei a ni. Mizo tawnga lehkhabu chhuak apiang chhiar a duha a lei zêl thîn. Chutiang chu a nih avângin lehkha zir sâng lo mahse a hriatna pawh a zau hle a ni. Khawtlâng thilah a inhmang peihin khaipa leh hruaitu a ni thîn. A awmna apiangah huan tha tak a siam zêl a, thlai chin uar lama mite fuih leh tihhmuhtu a ni a, thlai chite pawh mite a pe thîn.
Rinna-ah a nghet a, Kristian nunah a duh tui êm êm bawk. Tawngtai a uar a, an khaw bulah tawngtaina hmun a siam a, tûk tin chutah chuan a tawngtai thîn. A bial chhûnga mite nun pawh a hneh a, a Bial chhûng khaw hrang hrangah chutiang tawngtaina hmun chu an siam a ni. A chanchinah hian thil chhinchhiah tlâk tak tak leh ngaihnawm tak tak a tam hle a, chung a chanchin ngawihnawm tak tak te chu he lehkhabu 'Pastor Thanzinga Chanchin' tih ah hian chhiar tur a awm a ni.
Kum 1964 April 14-ah Sêrkâwn-ah khawvêl a chhuahsan a. A tûkah vuina inkhâwm Sêrkâwn Biak In-ah neih a ni a. Zohnuai thlanmualah phum a ni.
