BCM Administrative Committee Meeting No.75, Dt.13.7.2015(Mon) chuan BCM Pastor nupui hna neite chungchang thua thu leng vel, Kohhran mite rilru tibuai thei awma a hriat avangin Kohhran mite hnenah Assembly thu rel dan leh thil awm dan dik tak hriattir tulin a hria a, hetiang hian hrilhfiah a ni.

Mizoram Baptist Kohhran hian a khat tawkin hun lo kal tur atana rawngbawl dan tur leh Kohhran hmalak dan tur thlirlawkna neiin Planning mumal tak a siam thin a. Kum 2000 Planning Commission phei kha chuan Pastoral Ministry hi chak leh zuala kalpui a nih theih nan uluk takin ruahmanna a siam a, Pastor Bialte pawh then tet

zel a ni. Tin, Pastor ten an Bial chhung Kohhrante chu kim taka tlawh thin tur leh Chhungkaw tin te pawh tlawha rawngbawlna nei thin turin beisei an ni. Chutianga an rawngbawlna report chu Form siamsa hmangin Thla 3 bi zelah Headquarters-ah thehlut tura tih an ni bawk. Bialtu Pastorte chuan hei hi ngai pawimawha theihtawp chhuah tura beisei an ni. Kohhran (Pawl) hrang hrang inawmpawlh kan nih avangin kawng engkimah chak lo bik nih kan duh lo theuh bawk a; Kohhran nu leh pa chan chang bertu Bialtu Pastorte chu tunhma ai khan Kohhranhoten nasa takin kan phut ta a ni.

A tawi zawngin – chung avangte chuan a ni ang e, Kohhran enkawl hna hi Pastor-te tan hian chhungkua a thawh thamah BCM chuan a ngaia. Chuvangin Bialtu Pastorte chu an Bial chhungah chhungkuaa (Nupui nen) ngelnghet taka awm tura phutna Aw chhuah a ni ta thin a. Kum 1988,1993,1998,1999,2003 leh 2006 Assembly-ah sawiho a ni tawh thin a. Kum 2007 Pastoral Committee meeting No 116. Nov 28-29 chuan hetiang hian resolution a lo siam ta hial a ni:

(1) Sawt zawk leh tangkai zawk a rawng kan bawl theih nan Bialtu Pastor chuan a thawhna hmunah a nupui a hruai ngei tur a ni. (2) Hrisel lohna (health ground) avanga harsatna neite chuan Pastoral Committee ah thlen theih a ni ang. (3) Kum 2015 hnu lamah chuan Pastor/Minister nupuite chu Sorkar hna leh hnadang fulltime a thawh phal a ni lovang a. Kohhranin Pastor/Minister nupui service mamawh tak takna a nei a nih chuan, a mamawhtu Department chuan Pastoral Committee-ah a dil thei ang a, Pastoral Committee chuan a thu tlukna chu Executive Committee-ah a thlen ang. tiin.

He Pastoral Committee 2007 thu hi Assembly Executive Committee January 23-24, 2008-ah thlen a ni a, pawm niin chu chu Assembly 2008-ah ngaihtuah a ni a, Assembly chuan a lo pawm ta a ni.

BCM Missionary nupui/pasal te chu BCM hnuaiah chauh lo chuan hna nghet an thawh hi Constitution & Rules (2000) pawh khan a lo khap daih tawh a. Pastorte chungah pawh he dan hi 2015 hnu lam atanga hman ve turin Assembly 2008 chuan a lo rel ve chauh a ni. Pastor te leh Missionary te hi Kohhrana thawktu dangte aia Kohhranin a duhsakna leh a phutna hi a sang deuh a nih hi.

Kum 7 lai a lo liam a, a taka hman a nih dawn kum 2015 Assembly-a ngaihtuah nawn leh turin Lunglei South ABC chuan (a tawi zawngin) kum 2008 hma lama pastor/minister nupui, sorkar hna emaw hna dang emaw lo thawk nghet tawhte chu an thawh chhunzawm zel remtihsak nise; 2008 hnu lama mite chu April 1, 2015 atangin bang se, tiin thu a thehlut a; mahse a tlu zo ta chuang lova. Chumi awmzia chu Assembly 2008 thu kha a ngai rengin a la ding tihna a ni.

Assembly rorelna hi Kohhran mi rawihte chu sawi loh Mizoram Baptist Kohhran member zawng zawngte pawh zawm tura beisei kan ni a, kan zawm tha em em thin bawk a, hei hi BCM hmalakna kawng hrang hranga kan chakna thuruk pawh a ni - Assembly-a kan inphuarkhawm tlatna hi i vawng nung zel ang u. Pathianin Zosap Missionary-te hmanga min pek a nih hi.

He thu rel avang hian Pastor chhungkaw thenkhat –an nupuite Sorkar hna leh hna danga fulltime-a lo thawkte chu an insingsa mek a. Chhungkaw hmalak laklawh dan leh Hna kalhmang a inan vek loh avangin thenkhat an inpeih chhuak hma deuh a, thenkhat an inbuatsaih mek bawk a. Pastoral Ministry tha lehzual nei turin kan insingsa mek a ni. Chutih mek laia Assembly thurel sawiselna leh Palaite leh hotute vau ang dawn dawna - Human right kalh ang leh Rorelna (High Court) a thlen duh hial ni awma rin theih thu te leh “ Assembly hian a rel dik lo, Assembly rorel kaih lek a ang,” tih te a lo awm ta nawk mai hi pawi kan ti hle a; heng aia nasa zawka Assembly chirhthehna te pawh a lo la awm zel mai thei bawk – chutianga sawi duhte chuan an thlirna tlang atangin dik nia hriain an sawiah ngaihsak mai ila, BCM hminga dodal emaw chhan let emaw kan tum love. BCM chuan Pastoral Ministry hi Kohhran hnuk lai ber a nih avangin tha taka kalpui zel a tum avanga hetianga hma la hi a ni tih Kohhran mipui hian hria ila, tawngtainaah pawh i hre reng ang u, tiin kan inchah nghal ni rawh se. BCM hmalak dan leh thiltih dan hre chiang duh tak takte tan Head Office Serkawn chu englai pawhin a inhawng reng a ni. BCM Pastor zawng zawng te hian an tih tur leh tih loh tur chin chu an hre turah i ngai ang u tiin Administrative Committee chuan Kohhran mipuite hriat atan a rawn ziak chhuak a ni e.

Sd/- General Secretary Baptist Church of Mizoram