December 1-4, 2016 chhûnga BCM Pastor Conference neih chu hlim leh hlâwk takin an tiak ta. Mizoram chhûnga Pastor-te chauh koh an ni a, Pastor 131 an tel a, kal tura beisei zingah mi pahnih damlohna avanga tel thei lo tih loh chu an kal vek a ni. Conference chhung hian Programme that takin an hmang thei a, Pastor kalkhawm ten nuam an tiin hlawk an inti hle. 
Sawi tawh ang khan he Conference thupui atan “Nangni’n ei tur pe rawh u” (Marka 6: 37) tih thu hman a ni a, then hrang hrang hmangin thuchah leh Paper te buatsaih a ni. Conference chhung hian Zing karah Bible Study leh Tawngtai Inkhawm neih thin a ni a, chhun lamah Thupui then hrang hrang hmangin Seminar/Workshop neiin, zan lamah Worship Service theih a ni thin. Confenrence-a rawn kal, Pastor te hi Serkawn Tualchhung Kohhran-in an thlenin a lo buatsaih sak a ni.
Pastor Conference hi kum khat danah neih thin a ni a, hetah hian Mizoram chhung Pastor, Bial nei te bakah Probationary Pastor te, Mizoram chhung a, Department hrang hranga thawk Minister Bial nei lo te leh Pensioner te pawh koh thin an ni a, Mission Field-a thawk Pastor te erawh chu koh tel an ni lo thung a ni.
Tarlan tawh angin BCM Statistics-2015 – in a tarlandanin Mizoram Baptist Kohhran-ah Pastor thawk lai 137 leh Probationary Pastor 18 an awm mek a, heng bakah hian pensioner la dam Minister 37 an awm mek bawk a ni. BCM hi ABC 14-ah thenin, Pastor Bial 81 an awm a, Tualchhung Kohhran 642 an awm mek bawk.
