May 5, 2013, Pathianni hian Mizoram Baptist Kohhran huam chhungah Pastor bial thar pahnih- Saiha West Pastor Bial leh Leite Pastor Bial hawn a ni dawn.

Saiha West Pastor bial:

Saiha West Pastor bial hi BCM President, Rev.F. Sangvela’n a hawng ang a. Lawngtlai Area Executive Secretary, Rev.F. Ramdinmawian hawnna inkhawm a kaihruai ang. Saiha West bial hi Saiha Pastor bial atanga indang tur an ni a; Tualchhung Kohhran 5 awmin member 929 an ni a. Chungte chu Town Church (383), Meisatla (188), Phura (72), Lungpuk (204) leh College veng (82) te an ni a, Town Church-ah hian Pastor a awm ang a. Bialtu Pastor chu Rev.V.Biaknunsanga a ni ang. Saiha West bial thar hi Phawngpui ABC-ah an awm ang.

 Leite Pastor Bial:

Leite Pastor Bial hi Rev. Lalbiaksanga Chinzah, AGS i/c Service-in a hawng ang a, Pastoral Coordinator, Rev. R. Zohminglianan a kaihruai ang. He bial hi Hnahthial South bial atanga indang tur an ni a; Tualchhung Kohhran 4 awmin member 2031 an awm. Chungte chu Leite (552), Maudarh (49), Rotlang East (660) leh Tuipui D (770) Kohhrante an ni a. Leite-ah Pastor a awm ang a; an bialtu pastor chu Rev. Lalsangzuala Sailo a ni ang. Leite Pastor bial thar hi Hnahthial ABC-ah an awm ang.