Mizoram Baptist Kohhran Pastor Bial hrang hrang Rorel chu October ni 3, 2020 (Iinrinni) hian neih mek a ni.
Kuminah hian Kohhran Calendara tarlan Pastor Bial Inkhawmpui leh rorel neih hun tura ruat, October 2-4, 2020 chu Hrileng avangin Inkhawmpui neih theih a nih tak loh avangin rorel na hun chauh neih a ni ta a ni.
Kum dang ang lo takin hrileng avang bawkin Inkhawmpui Rorel Palai tur bithliah chungchang pawh Constitution-in min kawhhmuh piah lamah Administrative Committee in ruahmanna dang a siam bawk a ni.
Pastor Bial Rorelna-ah hian Bial chhung Kohhrante inenkawlna bakah ABC leh Assembly thlenga thu ngaihtuah tur te an ngaihtuah thin a ni a, Rorel hi Pastor Bial hrang hrang 88-ah te neih a ni.
Pastor Bial Inkhawmpui neih hma ni leh a hma chawlhkar ah te Pastor Bial tam zawk chuan Bial TKP, Bial BKHP leh Bial BMP Rorelna an nei bawk a. Bial thenkhatah chuan September thla atang khan FOD hrang hrang Bial rorel hi an remchan angin an lo nei tawh bawk a ni.
Mizoram Baptist Kohhran, Administrative Committee Meeting, July 10, 2020-a neih chuan Covid-19 Hrileng avanga khawvel leh Mizoram dinhmun thlirin hmalam huna Inkhawmpui pawimawh Bial huap Inkhawmpui hrang hrang TKP, BMP, BKHP leh KNP inkhawmpui te, Pastor Bial Inkhawmpui leh Area Baptist Council (ABC) Inkhawmpui te chu kumin atan chuan nei lovin, Rorel chauh neih ni se tiin thu a lo dah tawh a. Bial leh ABC Rorel palai tur pawh bituk felin ruahmanna a lo siam tawh a ni.
