Mizoram Baptist Kohhran Missionary, Pu Lalsangzuala Hnamte, Namsai , Arunachal Pradesh-a Evangelist thawk mek chu tukin, November 16, 2016 (Nilaini) zing dar 6:30 khan Lalpa hnenah a chawl ta. A ruang hi Mizoram-ah rawn phurh haw a ni ang a, a nupui chenna In, Shaloam, Mission Veng, Aizawl-ah nghah a ni ang. Ruahman anga thil a kal chuan November 18, 2016 (Zirtawpni)-ah BCM-in Missionary te a thlahliam dan angin, urhsun leh ropui taka vui a ni ang.
Pu Sangzuala hi insawiselna leh a inenkawlna a la rei lo va, Zung thei lo leh tai(pum) na avangin damdawiin hnai berah dah luh a ni a. A zun kawngah lungte a awm tih hmuh chhuah a ni a, Dibrugarh Private Damdawi In-ah chhutsawm sak a ni a. Amaherawh chu Zun kawnga lungte hi an chhutsawm vek theih loh avangin zai a ni leh ta a. Hetia zai a nih hian Septicemia-in a tlakbuak ta hlauh mai a, a natna a zual zel tak avangin Assam Medical College, Dibrugarh ah sawn a ni. A natna hian a thin, Lung leh chuapte khawihin natna dang dangin a tlakbuak ta a. Assam Medical College, Dibrugarh ah hian Novemeber 16th , 2016 zinglam dar 6:30am khan theih tawpa, a rawng a bawlsak thin Lalpa hnenah a chawl ta a ni.
Pu Lalsangzuala Hnamte S/o H. Doremthanga hi September 9, 1976 ah a piang a. Saiha, Council Vengah ah an khawsa a ni. Zirna lamah AICS-ah M.Div Batch hmasa ber niin 2010 khan a zir zova. Kum khat Delhi lamah missionary hna thawkin hun a hmang leh a. Hemi hnu bawk hian mahni inchawmin M.Th. a zir leh ta a. M.Th a zawh hnuin a tum ber leh a zir chhan ber Kohhran huang atanga rawng bawl duhna chu a rilru kap tu ber niin, a lawina Mizoram Baptist Kohhran hnuaia thawk turin Missionary hna chu a dil ve ta a. June 13th , 2013 Mission Board Committee chuan Missionary atan a la ta a ni. July 1st 2013 ah Appointment pek niin Namsai khua, Arunachal Far East ah evangelist hna thawk turin post nghal a ni a, a thihni thleng hian he post-ah hian a awm a ni. September ni 1, 2016 khan Nl. Rosaline d/o R. Lalhmingliana (L) BCM. Shaloam, Mission Veng, Aizawl nen an innei a, an nupa hian theih tawp chhuaha rawng bawl tura an inbuatsaih chhoh mek laiin, a natna hian rawn tlakbuakin Ropuina ramah a kalsan ta a ni.
Pu Sangzuala thihna hian Kohhrante leh a thawhna hnam, Arunachal Kristiante a thawng hle a. Lalpa tana mi tangkai leh a hun tam zawk A rawngbawl nana hmang mek leh thahnemngai taka Lalpa tana thihni thlenga rawng bawl a, Missionary hna thawktu Pu Sangzuala kan then ta hi Mizoram Baptist Kohhran chuan a sunin a ui takzet a ni. A kalsan, a nupui duh tak leh a chhungte zawng zawng leh Mission Field-a a rawngbawlpui te, a rawngbawlna hnamte Lalpan thlamuanin awmpui zel se tih hi Kohhran hote tawngtaina a ni.
"A Mithianghlimte thihna chu Lalpa ngaih chuan hlu tak a ni"
