February 27 – 28, 2022 khan Parva Pastor Bial Golden Jubilee lawmna BCM Biak In Parva III ah hman a ni a. Jubilee thupui atan ‘Lalpa’n min pui’ (I Samuela 7:12) hman a ni.
He Golden Jubilee hi General Secretary Rev. F. Ramdinmawia te nupa, Rev. B. Lalrinawma te nupa, Diltlang Area Baptist Council Puipa te, Vathuampui Pastor Bial leh Damdep Pastor Bial Puipa te, Parva Khaw chhuak Missonary thawk mek te leh Bial hruaitu hlui ten an hman pui.
Jubilee lawm chhung hian Rev. F. Ramdinmawia, Rev. B. Lalrinawma, Rev. Lalhruaitluanga Chawngthu, Upa S. Lalsangvuana leh Pu. CK. Thanga ten thuchah an sawi a, Inkhawm banah inpawlhona neih thin a ni. General Secretary in Golden Jubilee Souvenir a tlangzarh a, Rev. B. Lalrinawma’n Jubilee lungphun a hawng bawk.
Parva Pastor Bial hi kum 1972 tanga siam niin, hetih lai hian Tualchhung Kohhran paruk – Damdep, Chhippui, Parva iv, Parva ii, Tuisentlang leh Vathuampui te an ni a, Rev. Sialngena chu Bialtu pastor hmasa ber leh Bial Chairman hmasa ber a ni. Tun dinhmunah Parva bialah hian Tualchhung Kohhran pahnih Parva – III leh Silo (Parva) te an awm a, Chhungkaw 59 leh Kohhran member 304 an awm mek a ni.
