Mizoram Baptist Kohhran hnuaia, Missionary hriat hlawh leh Tripura Field-a Missionary thawk lai te zinga Senior ber, Nl. C.Lalnghingi, Evangelist chu April 30, 2017 khan superannuation pension in a chhuak ta. A pension ni thleng hian Missionary hna hi kum 37 leh thla 9 zet a thawk a ni.
Nl. C. Lalnghingi D/o C. ย Zadenga, Lungsen hi Kum 1955-ah a piang a, kum 1979-ah BCM Mahanaim Kohhran, Lungsen atangin Misionary-in a chhuak a, a thawh tirh atangin Tripura Field, khaw hrang hrangah a pension thlengin a thawk a ni. Kum 1979-1983-ah Tulamura-ah bul tanin, Tuicholong, Nupamrumva, Gamagur leh Bhijoynandi-ah te a thawk a, tuna a thawh mekna, Bhijoynandi-ah hian kum 2001 atangin a awm ta char char a ni.
Tripura-a a thawhna hnam leh Kohhrante chuan Nl. C. Lalnghingi Pension-a a chhuak ta leh a haw tur hi an ui hle a, May 9, 2017 khan amah thlahna neiin, an ui zia thu an sawi nasa hle a, Voluinteer Missionary-a thawk zawm leh turin an sawm hial a ni. Kohhran member thenkhat te chuan Lungsen thlenga zui/thlah haw an tum nghe nghe a ni. Hetihlai hian Lungsen khawtlang leh Kohhran pawhin theihtawpa lo chawimawi tumin amah hmuahna programme lian tak, khawtlang huapin an siam bawk. Lungsena a haw huna a invawmluhna tur, chenna in pawh an sa zo tawh nghe nghe a ni. Pi C. Lalnghingi hi vawiin hian Tripura atanga lo chhuakin, May 12-ah kum tam tak, Krista avanga a lo chhuahsan ama khua Lungsen hi a lut leh dawn a ni.
Mizoram Baptist Kohhran chuan hetiang mi, Krista tana thatlai hun zawng zawng hlan zo vek, leh Krista tana sengkhawm hna rinawm leh taima taka thawka Thlarau bo tam tam sengkhawmtu Nl. C. Lalnghingi hi a chhuangin a rawngbawlna hi a ngaihlu em em a, a hmalam hun lo kal zel turah duhsakna sang ber a hlan a ni.
