May 6, 2022 (Zirtawpni) khan New India Literacy Programme (NILP) Meeting, Directorate of School Education, Aizawl-a neihah Rev. L. Vanlalsanga, Director Education Department, BCM chu sawm a nih angin a tel. He Meeting-ah hian State Level Governing Council leh State Level Executive Committee te thukhawmin Education Minister, Pu Lalchandama Ralte in a kaihruai a. 
Central Sorkar-in ziak leh chhiar thiam lo te thiam tirna tur atana Project thar a siam leh hmalak dan tur a duan te thlirin sawihona neih a ni a, Education hmanga rawngbawlna kalpui mek Kohhran aiawh te pawh he Meeting-ah hian tel tura sawm an nih angin an tel a ni.
Meeting chuan Kohhran aiawhte hnenah ngenna siamin, Mission rawngbawlna an kalpuina hmun leh School hmanga rawngbawlna an neihna hmun hrang hrangah te Puitling Ziak leh chhiar thiam lo te hma tel tur leh rawngbawlna huanga rin lut turin a ngen a. Kohhran aiawha kalte pawhin hei hi tihhlawhtlin tha an tih thu leh State sorkar atanga sawmna mumal tak awm se tha an tih thu an sawi bawk.
Rev. L. Vanlalsanga hian He Meetinga a tel hnu hian Baptist English School, North Chaltlang a tlawh nghal a. School naupangte leh thawktu ten tha taka lo dawngsawngin School dinhmun leh kal dan te an lo kawhhmuh a, thawktute nen titihona an nei nghal a ni. BES North Chaltlang-ah hian zirlai 80 chuang zet an nei a ni.
