North East India Christian Council-Women Assembly chuan May 3-6,2012 hian Shillong leh Guwahati inkar Nongpoh khuaah Bi-ennial Assembly vawi 10-na an hmang mek a. Mizoram atangin MBKHP hruaitute leh mi dang te, an vaiin palai 60 vel an kal a. MBKHP Zaipawl in hla vawi 2 an rem a; cheraw an kan bawk.
Tunkar BCM Chanchin thar dang te:Bial KNP Inkhawmpui hmun 3-ah
Tunkar Pathianni hmang hian Bial KNP inkhawmpui hmun 3-ah neih a ni. Zanin atang hian Bungtlang Pastor bial KNP chuan Keitum Biak inah Inkhawmpui an nei dawn a, speaker atan Pu C. Lalbiakthanga an hmang ang. Mission Vengthlang bial KNP pawhin New Secretariat Complex-ah Upa F. Laldinliana speaker-a hmangin zanin atangin inkhawmpui an tan bawk. Bawngkawn bial KNP pawhin Ramhlun North Biak inah Rev.R. Lalrinmawia hmangin inkhawmpui an nei bawk. Kar hmasa Pathianni hmang khan Phawngpui West bial KNP inkhawmpui vawi khatna chu Lungtianah an bialtu pastor, Rev.F. Zorinkhuma hovin an nei tawh bawk.
Zotlang Bial BMP Programme
Kar kal ta, April 28-29, 2012 khan Aizawl Zotlang Bial BMP leh Lunglei Zotlang Bial BMP te chuan programme an nei ve ve a. Aizawl lamah hian an bialtu pastor, Rev.B. Lalrinawma hovin Inkhawmpui an nei a. Lunglei Zotlang bial hian Inrinni nilengin infiamna hrang hrang hmangin intihhlimna an nei a, zanah Zotlang North Biak inah an chhunzawm.
Saiha Bial Mission Campaign
Tunkar Pathianni hian Saiha Pastor bial huam chhunga Biak in hrang hrangah Mission Committee chuan Mission Campaign an nei dawn a. Inkhawm thawhlawm pawh Mission pual atan hauhvin, chawhnu lamah pawh Saihatlangkawn Biak inah Mission puual fehchhuah an nei ang. Mission lamah tan lak nasat an tum hle a, Mission Committee member chuan Mission Ar vulh theuh turin an inngen bawk.
Rev.R.Lalrinmawia te chhung kal dawn ta
Thailand-a BCM Missionary turin Rev.R. Lalrinmawia te chhung chu an thawhna hmun tur lam panin an kal dawn ta. May 11, 2012 hian India ram chhuahsanin Thailand an pan ang a; kum khat tawng an zir hnuah Thailand-ah pawh Thai hnam dik takte hnena Chanchin Tha hril tura tih an ni. Rev. Marina te hian fanu 2 nei tawhin an fa 3-na tur an pai mek a; an tan i tawngtai zel ang u.
Kristian Chhungkaw Chawlhkar hmang leh dawn
BCM chuan May 14-20, 2012 chhungin Kristian Chhungkaw Chawlhkar a hmang leh dawn a; he mi huna zir tur Thuzir bu, Rev.B. Zirsangliana, Buarpui bialtu pastor ziak pawh sem chhuah mek a ni.
Evangelist-te Rawngbawlna
Evangelist team rawngbawl mekte leh an rawngbawlna hmun kan hriat chin hetiang a ni: Ambassador For Christ team (Speaker :Upa K. Lawmsanga) nizan atang khan Falkawn Kohhranah rawngbawlna an tan a. Chanchin Tha Chuangtute team (Speaker: Upa K. Lalenga) te chuan Jampui tlang dung-Sakhan leh Phuldungsei Kohhranah te an tuam tan bawk. Gospel Messengers team (Speaker: Upa B. Lalthanliana) Shillong bial Madanrting Kohhranah Camping an nei a. Remna Palai team (Speaker: Ramdinmawia ) Phuldungsei vengthar Kohhranah. Gospel For All team (Speaker: Upa F. Lalnuntluanga) M. Kawnpui Kohhranah.
