Vawiin, May 19, 2016 (ningani) atang hian India hmar chhak pum huap-a Christian inzawmkhawm pâwl lian ber North East India Christian Council(NEICC) Inkhawmpui chu Sêrkâwn Biak Inah neih a ni dawn a.  “Christian Presence in the World” (Christiante-Khawvela kan awm chhan) tih chu thupuiah hman a ni ang. India Hmar chhaka Kohhran pâwl hrang hrang aiawh(palai )400 vel leh NEICC hruaitute an lo kal tura beisei an ni a, vawiin lamah palai(delegates) leh zaipawl te lo thlengin registration tih a ni ang. Zirtâwp leh Inrinni chhun lamah te Committee hrang hrang leh In dawrtawnna/Inkawmhona (Bussiness Session) hmangin zan lamah Vântlâng inkhawm neih thin a ni ang a. He Inkhawmpui hi Pathianni zanah an tiak ang.

NEICC Chanchin tlangpui

North East India Christian Council (NEICC) hi kum 1937 November ni 23 ah Assam Christian Council hming puin din a ni. Kum 1962 khan tuna a hming NEIC hian thlak a ni.

Kohhran hrang hrang inunauna tha, thiltiho leh thawhho, hmarchhak Kohhran hrang hrang aiawha a tul hun atan hmalak, kohhran inpumkhatna dap, Mission lama thawhona tha siam leh khawtlang leh rama chhunga thil thalo do (encounter with social evil and  issues)  te hi a ni.

A dintirhte tang hian a huhova thawhhona tur dap nghal a ni. Vawi tam sawiho hnuin, Christian College mamawhna a sângin, hmarchhak, abikin tribal hote kan la hnufual êm êm a, Christian College din chu rel thluk a ni ta a. Hetih hun lai hian Sap Missionaries te’n  min la thut chilh fur hlawm a, heng kan missioneries ho hi an phur êm êm a, anmahni hovin kum 1952 khan Shillong bul Barapani dil kam ngaw karah Khasi lal (Syiem) ram hawhin din a ni ta a ni. College hawn tirh hian zirlai 1 chiah an nei a, kum laklawha rawn belhchhahtute nen, zirlai mipa 6 leh hmeichhia 1 an nei ve ta. Union Christian College hi tunah chuan a changtlungin, college campus mawi leh nuam zet a lo ni ta. Zirlai pawh kumtin mi 750-800 a nei ve ta ziah a ni.

A din tirh atanga tun thlengin, vawi tam tak Kohhranhote thiltihho leh hmalak hona a awm tawh a, sawi sen a ni lo ang.  Kohhran hrang hrang kumtin (2012 atangin kum khat danah)  inkhawmpui neihho te,  Kohhran inpumkhatna vawi duai lo sawiho te, Sawrkar lakah vawi tam tak Kohhran ho aiawha din te, Mission field lama thawhhona tha dap te, neih fo tawh a ni. Thil chiang tak chu, NEICC-a  thawhho avang hian Kohhrante inzah tawnna, mahni kohhran fawr taka midang mitmei veng lek lova kalna tur hi thui tak a veng a ni.

NEICC kalphung hi sawi dang lam hlek hlek a awm nual tawh a. Tunah hian, Office Beraers 5 – President, Vice President pahnih, Full time Secretary (office-a thu) pakhat, Treasurer pakhat an awm mek. Secretary tih loh hi chu kum 2 term a ni. Secretary erawg fulltime a nih angin kum 4 term a ni a, term khat dang ruat nawn theih a ni. Shillongah NEICC hian Office Building leh Secretary Quarter a nei.

Rorelna thuah hian, Inkhawmpui rorel, Executive Committee, Working Committee leh Standing Committee paruk (6) a awm a, henga thurelte hi  Secretary-in Office atangin a bawh zui thin.

Kumtin, October chawlhni vawi 3-na hi NEICC day of Prayer ni atan NEICC Member tinin hman thin a ni a, hemi ni thawhlawm hi, NEICC puala thawn thin a ni.

A tulna leh mamawhna avângin kum 1993 chauh khan NEICC Youth Assembly hi Council chuan a approved a. Hemi hma daih 1940 chho atang khan thalai pâwl thiltih leh inkhawmpui lo neih fo tawh a ni bawk. NEICC Women Assembly hi 1984 khan mumal taka din leh pawm a ni a, hun hmasa lamah pawh Hmeichhe pâwl anga kalkhawm leh thil tih tam tak a lo awm tawh tho bawk. NEICCYA  leh NEICCWA hi, an mahni in  NEICC hnuaiah a hrangin an inenkawl a ni.

Kohhran tan member 5000 nei chinin membership a dil theih a, Christian Organisation  tan Associate membership a dil mai theih bawk. Tunah hian Kohhran member 35 leh  Associate member 16 an awm mek a ni.