17.10.2013: Tunkar Patianni(October 20,2013) hi NEICC Tawngtai Ni (NEICC Day of Prayer) a ni a. He Ni i North East India Christian Council zawmtu Kohhran hrang hrang ten an hmang ang.  NEICC Hqrs. Shillong atanga ruahman angin Kohhran pawl hrang hrangah rawng inbawltawn a ni dawn a. Ruahman anga a kal theih chuan BCM Biak in 14, PCI Biak in 14 leh Salvation Biak in 2 ah te anmahni Kohhran mi ni loten hun an hmang dawn a ni. Thupui ‘An zaa pumkhat an nihna turin’ tih a ni.

.....................

NORTH EAST INDIA CHRISTIAN COUNCIL: DAY OF PRAYER

Kristaa unau Kohhranho leh Ringtute,

20th October, 2013 hi India hmarchhaka Kohhran inzawmkhawm (NEICC) puala Kohhranhote kan tawngtai ni a lo ni leh ta. NEICC atangin Kohhrante chibai kan buk vek a che u. Kohhran hrang hrangte thawhohna huang thatak NEICC kan la nei thei hi lawmawm hle mai. Vawiinah hian NEICC 2012-2013 report tlangpui ka han tarlang e.

1. NEICC din kum 1937 atang khan tum 75 zet inkhawmpui hlawhtling tak kan lo nei ta. BCM pawhin palai leh zaipawlte a tir thin. Inkhawmpui hian kohhran hrang hrang inkarah inpumkhatna te, inhmelhriatna te, inthianna te leh thawhohna thuthlungte a siam a, a tangkai hle. Nakum 15-18 May, 2014 hian Churachanpur Sielmat EFCI kohhran te’n an dawl ve thung dawn a, Thupuiah pawh kan beirual leh Assembly thupui “I Puanin hmun chu zauh rawh” (Isai 54:2) tih tho kha kan hmang dawn a ni.

2. Mission lama thawhhona tha zawk kan neih zel theih nan 2012-13 chhung hian Agartala-ah leh Guwahati ah Mission Partnership Consultation buatsaih a ni. Missionary thawk lai leh an headquarters aiawhte sawm an ni, palai 200 zet an lo kal. Hlim leh hlawk takin kan neiin kan hria a, thawhona thupuan (partnership declaration) te siam a a ni. Nakumah hian Arunachal ah neih leh beisei a ni.

3. May ni 7-9, 2013 khan Lawngtlaiah Seminar hlawtling tak Mizoram leh Tripura pualin neih a ni. Lairam Isua Krista Baptist Kohhran te’n Peniel Kohhranah an dawl a, palai 100 zet an lo kal. NEICC kohhran member te bakah, NGO te pawh sawm an ni. He Seminar ah hian thupui 4, chibing inngeihlohna (ethnic conflict) thu te, homosexuality (neih in ang inngaihzawnna) lam te, sawrkarna tha leh corruption te, hnam inchimralna thute sawiho leh zirho a ni. Nakum 2014 hian Tura ah neih leh beisei a ni.

4. NEICC hian 1952 khan Union Christian College (UCC) Meghalaya-ah a din a. A kum 60-na (Diamond Jubilee) nikum 2012 khan neih a ni. CM Pu Lalthanhawla chu khuallian a ni. Kumin 2013 hian Khasi = 41; Garo=11; Arunachali=83; Manipuri=23; Mizo=75, Tripuri=42; Assamese=21; A dang =4, A vain zirlai 306 admit thar an ni. Tuna zirlai awm zat chu 800 zet an ni. Rev. S. Vanlalmalsawmdawngkima MTh, ECM chu College Chaplain hna a thawk mek.

5. Hmarchhak ah hian Theological College tamtak leh zirtirtu tha tam tak an awm. College mal tana harsa tak, tanho thiam chuan awlsam tak siin DTh zir theihna leh research (zirbingna) hrim hrim hi NEICC chuan awm theiin a ring a. Tunah hian Research Centre Programme, thawhhona huang kalkawng a dap mek bawk. Hei hi a lo p[uitlin theih hlauh chuan hmarchhak kohhrante tan a tangkai hle tura ngaih a ni.

6. Hmun hrang hranga chhiatna rapthlak tuartute hnenah tanpuina a Rs 4,27,000/- NEICC chuan a sem chhuak bawk.

7. Hmar chhak ram state te hi buai lo tak tak kana wm lo. Remna leh muanna awm theih nan NEICC hian NCCI leh Kristian pawl hrang hrangte nen tang hovin 2012-13 chhung hian tum 4 zet remna muanna dapin Imphal-ah te, Guwahti ah te, Shillong ah te thutkhawm a ni. Assam Chief Minister pawh Muslim leh Boro ho inbeihna avangin hmuh a ni, thisen chhuahna ti reh thuai thuai tura ngen a ni.

8. Christian sakhaw zirna (A Chair of Christianity) hi department pakhat anga awm ve turin Mizoram University (MZU) ah nawr mek a ni. MZU Vice Chancellor pawhin min phurpui a, kan lawm hle. Tunah hian syllabus chipchiar ziaka buaipui mek a ni. Hetiang chiah hian NEHU pawh dawr tan mek a ni.

9. NEICC hnapui ber pakhat chu member Kohhran hrang hrang tlawh a ni. 2012-13 chhung hian, Diphu te, Churachanpur, Imphal, Kohima, Haflong, Tura Mizoram hmun thenkhat leh Assam hmun then khat, West Bengal leh Tripura te tlawh a ni. NEICC Secretary leh President an kal chhuak nasa a, hei bakah hian Tualchhung Kohhran (local Church) hrang hrangah NEICC pualin hun hman thin a ni. Tin, 2012 leh 2013 NEICC Tawngtai Ni hian NEICC aiawh in tirin Kohhran hmun hrang hrangah thusawina leh report pek a ni bawk. Vawiinah pawh hian, Shillong, Aizawl, Lunglei, Lawngtlai, Haflong leh Churachanpur khawpui Kohhran hrang hrangah programme siam a ni.

10. NEICC ah hian member 51 kan inthlungkhawm mek a. Heng zingah hian Kohhran chu 36 an ni a, Kristian Pawl (para-churches) 15 an ni. Inkhawmpui hi kum khat dan zelah neih tawh tur a ni bawk. Pathian leh a ram tan Kohhranhote I thawk tlangin I in unau zel ang u.

Krista zara in rawngbawlpui,

Rev. R. Lalnunzira

Secretary
North East India Christian Council