Tunkar Pathianni, October 16, 2016 hi India Hmarchhak Kohhran hrang hrang inzawmkhâwm North East India Christian Council (NEICC) puala Tawngtai Ni a lo ni leh ta. Kum tin October Pathian ni vawi thumna hi NEICC Tawngtai Ni atân hman thin a ni. Kumin BCM Calendar-ah hian dahsual palh a ni a, October 16 emaw, Calendar ang hian emaw Tualchhûng Kohhran ten kan remchân dân anga hman mai pawh kumin atan chuan a sual lem lo thei mai ang chu.
NEICC REPORT TAWI
NEICC hi 1937-ah din a ni. Tunah hian member zawng zawng chu 51 kan ni. Member zingah hian Kohhran 34 kan ni a. Kohhran ni lo, Kristian pawl (Christian NGOs) 17 kan ni. Kum khat danah Inkhawmpui neih thin a ni. Kumin 2016 khan BCM, Serkawn ah neih a ni. Kum 2018 ah New Nongstoin Presbyterian Church, Meghalaya ah neih a ni ang.
NEICC hian Project 2 a nei. Chûngte chu Union Christian College, Barapani, 1952-a din leh UCC Higher Secondary School, kumin 2016 atanga NEICC kuta awm thar te hi an ni. UCC-ah hian zirlai 800 zet kan nei. Arts, Science leh Commerce graduate thlenga zir theihna a ni..
Higher Secondary School hi, UCC Campus chhûngah a awm a. Lower Primary atanga Class XII thleng ruahman a ni. Class X leh Class XII kan la nei lova, nakum 2017-ah hawn tan an ni ang. Tûnah hian zirlai 183 zet kan nei. Kumin 2016 atanga NEICC Project thar chauh a nih avângin, mamawh a tam hle. School Building, Hostel leh Staff Quarters te sak a ngai a, sum tam tak kan mamawh a ni. Tin Zirtîrtu pawh a thar lâk belh zêl a ngai dâwn a, bul tan chauh kan nih avângin, Union Christian College zirtîrtute'n part time-in an zirtîr rih a. Classroom pawh College ta hi hawh nual a ni.
Engtikah emaw chuan NEICC-a tang ho zêlin Christian University lian tak kan la nei thuai ang. Hei hi kan vision pawh a ni. Ram kan nei zau va, tûnah hian MA leh Research beihna chauh hawn kan hmabâk tawh a ni. North East-ah hian Christian University tih tlâk tak kan la nei lova, NEICC kal tlang hian Deem University kan la neih ngei hi a rinawm a ni.
NEICC kal tlang hian Kohhran hrang hrangte thawhhona tûr a tam hle. Remna leh muanna, Kohhran inpumkhatna, Mission field-a thawhhona tha, khawtlâng siamthatna, Pathian thuzirna leh hriatna lama hmasâwnna kawng dap te hi NEICC kal tlang hian kan thawk thîn a, kan thawk mêk a, kan la thawk zêl dâwn a ni.
NEICC thlazâr hnuaiah hian NEICC Thalai Pâwl (NEICCYA) leh, NEICC Hmeichhe Pâwl (NEICCWA) an awm bawk. Inkhâwmpui hrang, rorêlna hrang, thiltih hrang an nei a. Kum 2018 hian NEICCYA chuan kum 25-na Silver Jubilee Shillong-ah an lâwm dâwn nghe nghe. NEICCYA hi a va upa lo ve kan ti mai thei a. Kum 1940 bâwr chho atang khân thalai puala thil tih leh inkhâwmpui hial te pawh chuklak deuhva lo neih thin tawh a ni. Amaherawh chu, kum 2010 NEICC inkhâwmpui leh rorêl Siaha-a neih chuan 1993 hi NEICCYA mumal taka (full fledged) a din kumah a nemnghet a ni. Hei hian tunhmaa akûl ataia lo inhmang thînte kha a en khûm ta tihna erawh chu a ni lo.
Kum 2018 Inkhâwmpui awm leh hma hian, Aizawlah ni 2 awh Seminar lian tham tak buatsaih tum a ni. Hetah hian, Sik leh sa danglamna (Climate change) chungchâng, Mipa leh hmeichhe inkâr thil (Gender Isuue) leh Kohhran inpumkhatna (Church Unity) te a bîk takin khel tum a ni. Hemi bâkah Guwahati-ah hnamtchi bing etc. avânga buaina tam ta lutuk tihziaawmna a nih beiseiin Kohhran hruaitute sâwm khâwmin zirchianna leh sawihona khûnkhân tak 'Making Sense of Turbulence Contexts (MSTC)' buatsaih a ni bawk ang.
NEICC kum 75-na hriatrengna In Shillongah sak mêk a ni. November hian hlanna (Dedication) kan nei ang. He building sak nân hian chêng nuai 45 vêl kan sêng a ni.
ISUA VISION CHU KHAWVEL (OIKUMENE) A NI.
Mahni vêng, mahni khua, mahni Kohhranah hian kan lungawi tâwk viau hi thil lâwmawm tak a ni. Amaherawh chu, kan rilru erawh ti zîm kher lo ila. Kan Lal Isua hian khawvêl a tin zâwn tlat a. Khawvêl zawng zawngah, Hnam tina mi, kâwlkil thleng pawhin, tihte hi kan Lalpa tawngkam a ni. Mahni duhna china ramri kham ngawt hi Krista thinlung nên a inrem lo fo mai.
Krista thinlungah chuan khawvêl hi chhûngkua (Greek tawngin, oikumene = household) kan ni, thliar bîk leh ensan bîk a nei lo. Krista Mission pawh hi khawvêl pumpui hi a ni tawp mai. Hnam dang kawm peih, mi dang thiana siam, kohhran hrang hrang nêna thawhho, kan kohhran huang pâwn lam dai dar ngam, mi dang nêna thiltih ho thin hi kan Lalpa zirtîrna nên hian a inhmeh hle a ni. Thilsiam dangte pawh Pathian duh lai vek an ni bawk. Engkim inrem taka awmho tûr leh inpumkhat tûrin kan Pathian hian min duh a ni. Kohhran leh mi mal te hian heti zâwng hian thil thlîr ila, kan khawhawi tizau zêl ila, mi dang nêna inpumkhatna lam uar ila a tha hle ang.
Kan chêt vêlna huang pâwnah hian mi tha tak tak, thian tha tak tak, Pathian hmangaih êm êmtu tam tak an lo awm ve reng a nih tih hi hairual a ni lo. NEICC-a kan thawhho avâng hian thian tha taka inchhar chhuak ta te, inhmêlhriat te, kohhran inzah tawnna leh inunauna te hi a thleng ve mêk zêl a ni.
Pathian Ram a lo zau va, a lo ngheh a, a lo lanfiah deuh deuh theih nân Krista thinlung tawmpuiin khawvêl hi i thlîr ve ang u.
Rev. R. Lalnunzira
Secretary, NEICC, Shillong
