MTKP Rorel 2012 Bawhzuina leh Tul dang inhriattirna

1. Mission atana hmalakna turte :

(a) MTKP tih tur te: 1. Mission Support uar taka kalpui zel nise 2. Mission Relief chhunzawm zel nise 3. Bial leh Unit ten missionary support kan pek dan Thalai Entu-ah chhuah thin nise (Bial leh Unit    Secretary te nen tanho nise) 4. Mission Consultation or Mission Drive : Aizawl leh Lawngtlaiah buatsaih nise. 5. Mission Field / Station tlawh leh nise.   (b) Bial leh Unit tih tur te:

1. Missionary Support pek tum theuh nise : (Missioary Support-ah hian nikum, 2011-2012 chhung khan BCM chuan kan target kan phak lova, Kohhran te leh Fellowship Organisations te thahnemngai lehzual turin Missions Dept chuan min ngen a, MTKP chuan Bial leh Unit tinte thahnemngaihna thar nena Missionary Support pe turin a beisei a ni.)
2. Work Camp / Mission Field tlawh theite chuan hmalak nise
3. Bial leh Unit atanga kan member Missionary-a kalte chu chawimawina hlan nise
4. Deputation / furlough-a missionary ten min tlawh tumin TKP member ten thahnemngai taka tawiawmin kan theih anga tanpuina pek thin nise. TKP programme-ah pawh a remchan dan anga anmahni tarlan thin nise.
5. Kan Tawngtainaah standing subject atan hman nise.

  2.  TLM tana hmalakna turte : Bial leh Unit a tam thei ang berin TLM-ah member nih tum nise. (Founder Gift Rs 1000, Patron Rs 500, Life Rs 300) Bial kilkhawr deuh, mahnia TLM dawr harsate chuan MTKP kal tlang pawhin membership donation hi pek theih a ni ang.     3.   Electronic Media hman sual chungchang : 1)      Electronic Media hman sualin mimal, chhungkua leh khawtlang nun a nghawng chhiat theih dan leh a tangkai zawnga hman theih dan tur Unit tinte zir tur MTKP in a buatsaih ang. 2)      Cable TV Operator-te hnenah Film thianghlim lo, zahmawh rawngkai leh tharum thawhna tihluar thei ang chite chhuah lo turin MTKP hmingin ngenna siam nise. Tin Film siamtute leh letlingtute pawh tawngkam hman chungchangah fimkhur lehzual tura ngen nise. 3)      DDK / AIR / Cable TV ahte Talk Show buatsaih nise. (Sub-Committee-in a buaipui ang) 4)      Bial leh Unit tinin mahni theih ang zelin Facebook-ah Kohhran leh khawtlang tana thil tul lo leh tangkai lo post & comment lo tura inzirtir nise. Internet (Facebook) Etiquettes pawh inzirtir thin nise. 5)      Electronic Media hman sualin mihring nun a hruai sual theih zia hi tualchhung kohhran tinah Pathianni zingah emaw inzirtirna neih a nih theih nan Unit tin ten mahni tualchhung kohhran theuhah dilin ruahmanna siam nise.  

4.   Environment humhalhna lama hmalakna turte :

1)      Unit tin ten mahni Area-ah thingphunna remchang a awm chuan thingphun nise, tha taka enkawl zui nise. Thing ding sa / phun sa humhalh kawngah pawh hmalak nise. 2)      TKP ten sum tuak nan Sorkar phal loh hmanga nungchate man lo tur leh tihlum lo turte, ramhmul leh nungchate tichereu zawnga sum tuak lo turtein mahni hmazawn theuhah inzirtir thar leh nise. 3)      June 9, 2012 (Inrinni) hian ram pumah a rual tlangin MTKP, Bial leh Unit ten mahni tui lakna / tuikhur hnar (catchment area)-ah tuihna a tam lehzual nan thingphun theuh nise. Thing phun belh ngaihlohna / rem lohna hmuna mite chuan a awmsa humhalh kawngah hmalak nise. Tin, tuikhur tibawlhhlawh thei tihfai leh tuikhur hiahfaite pawh tih nise. Thing phun tur hi mahni unit theuh inngaihtuah nise, Bial huapa a huhova hmala duh tan pawh tih theih a ni. Thingphun hnatlang thlalak hi MTKP Organiser hnenah thawn theuh nise, MTKP Inkhawmpui Photo Exhibition-ah pho chhuah nise. (June 9-a hmala hman lo leh remchang lote pawhin mahni remchan hunah ngaih pawimawh nise) 4)      MTKP Inkhawmpui 2013, Haulawngah Environment Photo Exhibition neih nise. 5)      Mahni Bial leh unit tinah Polythene hmang tlem tur leh a paihna lama fimkhur tura inngen nise.  

5.   Nulat tlangval kawnga thianghlimna inzirtirna leh dan puitlinga inneih uar tura inzirtirna :

1)      Nulat tlangvalna kawnga thianghlimna inzirtirna leh dan puitlinga inneih a thatna paper unit tinte zirtur MTKP-in buatsaih se. 2)      Kum thar 2013-2014 ah unit tinin kan project / planning-ah hemi chungchanga hmalakna tur hi neih nise. 3)      Unit tin ten kohhran dan puitlinga inneite lawmpui leh chawimawina kawngah nasa lehzuala hmalak theuh nise. 4)      Bial TKP inkhawmpui / Meet etc ahte he thupui hmang hian a theite chuan Drama / Skit competition buatsaih emaw programme-ah telh emaw ni thei se. 5)      Heng thupui hmang hian short film competition MTKP in buatsaih dan ngaihtuah se.  

6.  2012 MTKP Rorelnaa kan thurel dangte –

Sound Operating Video siam, MTKP in SMS Gupshup siam, E-Bible chungchangte pawh ngaihtuah a ni a, a remchan dan anga hmalak zel a ni ang. TKP emblem leh inkaihhruiana chungchang te chu FOD Committee kal tlanga siam that theih chauh a nih avangin FOD Committee-ah ngaihtuah tura thlen a ni. Tin, MTKP inkhawmpui atan kum khatah vawi hnih (2) fehchhuah neih ni se tih kha bial leh unit enge maw zatin an rawn tihlawhtling tawh a, thahnemngai taka hmala zel tur pawhin kan inchah nawn leh nghal bawk a ni.    

7.   2013 MTKP Inkhawmpui chungchang :

1)      Inkhawmpui hun atan March 21-24, 2013 ruat a ni. 2)      Thupui atan ‘Lalpa hman tlak’ 2 Tim 2:21 thlan a ni. 3)      Zaipawl chungchangah chuan 1) BCM Choir, 2) BCM Lawngtlai Area Choir leh 3) BCM Aizawl Area Choir leh 4) BCM Haulawng bial Zaipawlte zai tura beisei an ni a, heng bakah hian TKP unit a tam thei ang ber zaipawl nei turin MTKP chuan a beisei a. 2013 MTKP Inkhawmpuia Unit zaipawl nei thei turte chuan September 2012 ral hma ngeiin MTKP Organiser hnenah mumal taka report tur a ni, hemi chhunga in report lo te chu programme-ah thun a rem lovang. Inkhawmpuia zai tum Zaipawlte hi tha taka zai thei turin uluk taka inbuatsaih nise, zaipawl kan inbuatsaihnaah leh kan hla thlanah pawh kan thupui hi tarlan theih hram tum nise. Bial zaipawl atang chuan a thlengtu Haulawng Pastor Bial Zaipawl te hi zai tura beisei nise tih a ni. 4)      Inkhawmpui Hla bu buatsaih tan mek a ni a, November 2012 ah chuan zawrh chhuah hman tum a ni. 5)      Inkhawmpui duhawm tak kan neih theih nan Pathian hnenah thahnemngai taka tawngtaiin tan i la theuh ang u. 2016 MTKP inkhawmpui thlen diltu kan nei tawh a, thlan fel a la ni rih lo.   Tawngtai thu : MTKP Executive Committee chuan tunlaia kan ram leh khawtlang leh politics-a harsatna chi hrang hrang thlengte a thlir a, sualna leh heng harsatna chi hrang hrang avanga kan ram leh hnamin a tuarnate a lo reh  a, mitinte hnenah Pathian ram a lo thlen zel theih nan TKP te hi nasa lehzualin Pathian hnena kan tawngtai a tulin a hria a, Unit leh Bial hrang hrangah TKP te hian tawngtaina hun mumal tak kan nei thin tih hriain MTKP chuan member tinte nasa lehzuala tawngtaia Pathian au turin a ngen a ni. Tin, June 30, 2012 nileng hian BCM chuan ram pum huap tawngtaina a buatsaih dawn a, TKP member-te pawh thahnemngai taka he hun hi hmang turin kan inngen nghal bawk a ni.   TKP Ni Pawimawh te : TKP te hian ni pawimawh pahnih, TKP Ramthim ni (May 29) leh TKP Day (July 30) kan nei a. Heng nite hi TKP te rawngbawlna atan hun hlu leh pawimawh tak a ni. Unit tin te thahnemngai leh uluk taka kan ni pawimawhte hmang turin kan inchah a. BCM Special Day Programme (BCM Ni Pawimawh bu) a tarlan bak kha chu unit tin ten mahni tha tih anga ruahman nise.  

 Rev Samuel Lalremsanga

Organiser, Mizoram Thalai Kristian Pawl     Cc: 1) All Bialtu Pastor & Pro Pastor; an lo hriatpuia a tul anga an lo tanpui theih nan. 2) All Unit TKP Presidents & Treasurers. 3) All Bial TKP Secretaries.