Mizoram Thalai Kristian Pawl (MTKP) Inkhawmpui vawi 46-na Lawngtlai CYLA Ground-a neih tur chu vawiin thlenkim ni a nih angin hmun hrang hrang atangin palai an thleng khawm mek a, chanchin kan ziak lai hian 2000 chuang zet thleng tawhin chawhnu lam leh zan-ah te a tam zawk la thleng tura beisei a ni. Inkhawmpui kal tura in ziak lut mi 7000 zet an awm a, Bial hla deuh la thleng lo leh Bial hnai vai, naktuk zing lama kal tur engngemawzat an awm bawk. (Kuminah hian Inkhawmpui kal tur te chu Pre-Registration tih a ni a, hei bakah hian a hmuna in register chawp tur pawhin ruahmanna siam a ni)  Tarlan tawh thin ang khan kumin MTKP Inkhawmpui thupui chu "Mamawh chhanna - Isua Krista" tih a ni.

Inkhawmpui hawnna Inkhawm hi zanin Dar 6:00-ah Pandal-ah neih a ni ang a. 6:30 thleng Pathian faka zaihona atan hman niin 6:30-ah programme tan a ni ang. Hun hmasa lamah Opening Ceremony neih a ni ang a, Nl. Zothantluangi Khiangte leh Pu Lalnuntluanga (MTKP) ten an kaihruai ang a, Salem Unit, Lungleiin Worship Dance, Ramhlun 'S' Unit-in Body Mime an entir bakah Female Trio-Pensy, Bethsy leh Temi-i ten an present bawk ang. Rev. F. Ramdinmawia, Executive Secretary, Lawngtlai-in Inkhawmpui a hawngin, Rev. R. Lalbiakliana MTKP President-in Palaite lawmna a sawi ang. Hemi zawh hian Pathian Biak Inkhawm (Worship Service) in a zawm nghal ang a, Rbt.Lalthansanga Hnamte, Executive Committee member-in Inkhawm a kaihruai ang a, Rev. C. Lalrochama, Arunchal West Field Director-in thuchah a sawi a. (Detailed Programme)

Zanin-a Zaia rawngbawlturte hengte hi an ni ang:-

Solo turte 1) Esther Lalthianghlimi, Kanaan (Azl),

2) C.Hmingthansanga, Diltlang,

3) F.Lalremsiami, Zotlang (Lli)

Zaipawl zai turte

1) Inkhawmpui Zaipawl,

2) Zotlang Bial (Azl),

3) Diltlang Bial,

4) Theiriat Bial,

5) Saiha W Bial,

6) Tawipui Bial,

7) Leite Bial

Naktuk, February 19 (Zirtawpni) khian Lawngtlai Bazar Biak Inah MTKP Rorel neih a ni ang a, Rorel Palai ni ve lo te tan Pandal-ah Variety Programme/Fellowship a awm ang. Kumina MTKP Rorel agenda lo tarlang ila:- MTKP Rorel Agenda-2016

1. MTKP huapin a ruala chaw nghei tawngtai neih ni rawh se. (Tuiphai Bial)

2. TKP member hlate pualin chawnghei tawngtai (A rualin) rampum huapin neih ni rawh se. (Mission Vengthlang Bial)

3. ‘MTKP-in tawngtai khaidiat a buatsaih thin ang khan’ kum 2016 chhung hian tawngtai khaidiat buatsaih nise. (Phuldungsei Bial)

4. Kum 2016 chhungin ruihhlo ngaite pual leh Missionary-te tan tawngtai khaidiat nei turin MTKP hian hmalak nise. (Hrangchalkawn Bial)

5. Christian Hospital, Serkawna hman tur ‘Electrolyte Analyzer’ leina tur TKP member tinte hnenah Rs 10 khawn a nih theih nan MTKP-in hma la rawh se. (Bawngkawn Bial)

6. Christian Hospital, Serkawn-a hman tur Electrolyte Analysers leina atan TKP member tinah Rs 10/- khawn nise. (Serkawn Bial)

7. MTKP members tin ten BCO tanpui nan Rs 5.00 theuh thawh nise. (Parva Bial)

8. Jubilee Bible School pualin, kum 2016 chhung hian Unit TKP tin ten fehchhuah vawi khat neih ni rawh se. (Tawipui Bial)

9. Kum 2016 chhungin MTKP-in Chhawmdawlna In sum faiin tanpui nise. (Mission Vengthlang Bial)

10. Baptist Printing Press, Lawngtlaia hman atan Digital Printer Tray pakhat nei chi lei a nih theih nan Unit tinin fehchhuah neih nise. (Diltlang)

11. Kristian Literature lama hma kan sawn theih nan MTKP-in hma la rawh se. (Bazar Bial)

12. MTKP hmalaknain Information Technology, a tha zawnga hman tangkai dan inzirtirna neih nise. (S.Vanlaiphai)

13. Kristian Hlabu leh Holy Bible ngainat inzirtir thar nise. (Hnahthial N)

14. Zirna pawimawhna leh hlutna inzirtir kawngah MTKP hian hma la se. (Hnahthial N)

15. Thalai zingah mahni intihlum leh tualthahna hluar lutuk hi a tlem theih nan MTKP-in Awareness Campaign neih ni rawh se. (Theiriat Bial)

16. Thalai-te hian tun aia kan nu leh pate zahna leh thuawihna kan neih theih nan MTKP hian hma la rawh se. (Buarpui N Bial)

17. ‘Taihmak’ inzirtir a nih theih nan MTKP-in hma la rawh se. (Zotlang Bial, Azl)

18. MTKP hmalakna-in Leadership Training buatsaih ni rawh se. (Cherhlun Bial)

19. MTKP Inneih lawmpuina (certificate)-ah hian Baptist Church of Mizoram tih hi dah tel ve nise. (Lawngtlai S Bial)

20. MTKP hmalaknain ruihhlo that loh zia inzirtirna Awareness Campaign neih ve ni rawh se. (Bungtlang S Bial)

21. Ruihhlo that lohzia inzirtirna kawngah MTKP hian chak zawka hmalak ni rawh se. (Chhipphir Bial)

22. Ruihhlo, “Meth” chungchanga inzirtirna kawngah MTKP hian hma la rawh se. (Phawngpui N Bial)

23. Environment humhalh kawngah MTKP hian chak leh zualin hma la rawh se. (Phawngpui N Bial)

24. Human Trafficking chungchang MTKP huapin inzirtir nise. (Chanmari Bial)

25. Kum 2018 MTKP Rorel inkhawmpui hi Zemabawk Pastor Bialah nghah nise. (Zemabawk Bial)

26. TKP Inkaihhruaina Dan hi inkhawmpui kumah chauh siam thatna tur thu hi rel nise. (Zemabawk Bial)