Mizoram Thalai Kristian Pawl (MTKP) Inkhawmpui vawi 45-na March 21-24, 2013 a Haulawnga neih tur chu inbuatsaihna hrang hrang te ngawrh taka kalpui niin a dawltu tur Haulawn Pastor Bial te pawh an tang hle a. Tunah hian Pandal 70% vel an peih tawh a, mikhual thleng turin chhung tin an inbuatsaih bawk. Mizoram TKP Office lam pawh inpeih thawkhat tawhin Inkhawmpui Programme (Final) an siam zo tawh a, Printing Press ah an chhut tir mek a, tunkar hian thawn chhuah hman tum a ni. Inkhawmpui Hlabu pawh chhut mek a ni a, hei pawh hi peih hman an in beisei bawk.
 |
 |
Tarlan tawh thin angin Mizoram TKP Inkhawmpui 2013 hi Haulawng Pastor Bial-in Haulawngah an thleng dawn a. Kumin Inkhawmpui thupui atan "Lalpa Hmantlak" (II Timothea 2:21 ) hman a ni ang a. Speaker hran nei lovin mi hrang hrangin an sawi dawn a ni. Inkhawmpui tan zan, March 21(Ningani) zanah Palai lawmna leh Inkhawmpui hawnna neih a ni ang a, a tuk March 22 (Zirtawpni) ah MTKP Rorel neih a ni ang a, Rorel Palai ni ve lo te tan Pandal-ah Variety Programme/Fellowship a awm ang. A tuk Inrinni chawhma-ah Seminar neih a ni anga, Seminar hi Topic hrang hrang pangaah then a ni a, Mahni duhna ber-ah kal theih a ni ang.
Zan lamah Vantlang/Pathian Biak Inkhawm neih ziah a ni ang a, Pathianni Chawhma Vantlang Inkhawm awmin, Chawhnu lamah Lalpa zanriah(Sacrament) buatsaih a ni ang. Zan lamah Inkhawm a awm leh ang. Inkhawm apiangin Zaipawl 8-10 vel an awm deuh zel a, heng bakah hian Solo 2/3 dah zel a ni bawk.
