January 12, 2021 khan Mizoram Thalai Kristian Pawl (MTKP) Executive Committee Meeting, BCM Committee room, BCM Office, Serkawn-ah MTKP President, Rev. Vanlalmuankima kaihhruaina in neih chuan, Kum 2022 MTKP Inkhawmpui thupui atan “Krista Tana Danglam Ngam” tih an thlang fel.
Meeting thurel langsar dang zingah - MTKP Rorel Inkhawm, February 11, 2021 hian BCM Biak In, Electrict veng, Aizawla neih turah, Covid-19 hrileng avanga Sawrkarin Inkhawmpui leh programme pawimawh-a mipui punkhawm a phal sak zat te thlirin, MTKP Rorel Palai tur an bithliah fel a. Pastor Bial tin atangin aiawh pakhat zel in tirh ni se, kumin bik-ah chuan Unit aiawh chu in tirh loh mai ni se an ti a, Rorel thlenkim zana Palai lawmna Inkhawm neih thin pawh kuminah chuan neih loh mai ni se an ti bawk.
Tin, MTKP Inkhawmpui 2022 Logo insiamsiak buatsaih ni se la, January ni 28, 2021 chhunga thehluh theih ni se, Logo atana thlan chhuah hnenah lawmman atan Rs. 2,000 leh citation pek ni se an ti a, Inkhawmpui theme song buatsaih ni se la, hemi lama hma lo la turin Rev. K. Lalbiakenga, Tv. C. Vanlaldintharpuia leh Nl. J. Lalrintluangi te ruat nghal an ni bawk.
