Mizoram Thalai Kristian pawl Executive Committee meeting September 18, 2020-a neih chuan thu pawimawh tak tak an ngaihtuah a. An thu rel langsar zingah MTKP rorelna-in a lo passed tawh Mizotawng humhalh chungchang leh Gender Identity chung chȃnga Sub-Committee in ruahmanna an lo siam chu thlirin hetiang hian an pawm:
Gender Itendtity chungchanga MTKP ngaihdan(stand):
“Pathianin mihring hi mipa leh leh hmeichhiaah a siamna. (Gensesis 1:27) Pathian min siam dan baka mipa leh mipa, hmeichhia leh hmeichhe inkara hurna lam kawnga awmherh, inngaihzawnna leh inneihte hi Pathian thu leh BCM Inkaihhruaina (Rules-III, 24:122(9) kalh a ni a, hetiang kawnga harsatna neite chhanchhuah leh Pathian duh dan hriattir hi MTKP chuan kan tih turah kan ngai a ni” tiin. Hemi kawnga hmalak dan tur pawh hetiang hian duan a ni:-
- Thuzir buatsaih: Member zawng zawng ten an zir theih turin Seminar booklet buatsaih ni se, a ziak turin MTKP Organiser beisei a ni.
- Counseling Guide (booklet siam): Kawng thum, dan lam, Damdawi thiamna lam leh pathian thu atangin ziak ni se an ti a, ziak turin heng te hi ruat an ni:-
Law (dan lam) - Pu ZD Lalnunsanga, Lunglei, Chanmari
Medical (Damdawi lam) - Dr. Isaak Lallawmkima, Serkawn
Theological(Pathian thu) - Rev. Dr. H. Lalthlamuana, AICS
Editor - Rev. Vanlalmuankima, President, MTKP
- Helpline siam: Mahni nihna (gender identity) lama harsatna neite tan MTKP in Help Line neih leh Counsellor kawhhmuh ni se. Hemi atan hian Christian Counseling Centre, BCM hi dawr ni se. Hemi atan hian video clip/picture siam ni se.
- Tawngtai: Unit leh bial-in hmalakna tura tawngtai programme siam ni se.
- Short Video: Short Video buatsaih hi unit hrang hrang competition atan buatsaih ni se.
- MSACS te a tul anga thawhpui dan zawn ni se.
Heng hmalakna atan hiian budget cheng nuai khat, sing nga (Rs. 150,000/-) ruahman chu pawm a ni bawk.
Mizotawng Humhalh leh Tihhmasawn Chungchang ah MTKP in Ruahmanna a siam.
Mizoram Thalai Kristian pawl Executive Committee meeting September 18, 2020 a neih chuan Mizo tawng humhalh leh tih hmasawnna tura hma lak dan tur ruahmanna sub.Committee-in a lo duan thlirin a pawm a. Hetiang hian hma lak dan tur ruahman a ni:-
- Mizotawng chungchangah mithiam te sawmin talk show, Audio visual nen tangkawpa buatsaih ni se, TV leh MTKP Youtube channel-ah en theih turin video siam ni se.
- Hnamdang te tana tangkai turin, MTKP Youtube channel-ah en theih tur video, inbiakna tawng tualleng (simple conversation) Mizo tawng leh sȃp tawngin buatsaih nise.
- Mizo tawng kan hman dik loh leh a dik zawk, a ziaka ziak chi leh a sawia sawi chi bakah grammar inzirtirna bung hrang hrang (episode) MTKP Youtube channel-ah en theih turin, mithiam (Resource person) sawmin video siam nise.
- Mizo tawng chungchang topic hrang hranga thenin booklet buatsaih nise, hetah hian Mizo tawng (Duhlian tawng) bik chauh ni lovin, Mizo hnam hrang hrang, mahni hnambil tawng bik neite pawhin an tawng humhalha venhim bakah hman dik a pawimawhna pawh telh nise. Bial leh Unit tinah a copy pek vek nise.
- Mizo tawng humhalh leh tihhmasawn kawngah thuziak tamzawk tichhuak turin Thalai Entu hman tangkai nise.
Heng ruahmanna te tihhlawhtlinna tur hian budget cheng nuai khat leh sing 5 (Rs. 1,50,000.00) pawm a ni bawk.
