Kar hmasa Inrinni, January 28, 2023 khan MṬKP Executive Committee Meeting Vawi 540-na chu Sap upa leh Pu Buanga Hall, Hqtrs Office, Serkawn-ah neih a ni a. Meeting hi Upa R.Lalrochama, President in a kaihruaia, Rev.F.Zorinkhuma, Secretary in MṬKP hmalakna leh rawngbawlna hrang hrang report pe in hmachhawp hrang hrangte a tarlang bawk. Treasurer Nl.J.Lalrintluangi leh Tv. H.Lalruatkima, Fin.Secretary ten sum hmuh leh hman dan report (ziaka semin) an pe bawk.

Report aṭanga a lan danin tunah hian Pastor Bial 92 zingah, bial 87-in Target an tlak tawh a, bial 77-in Myanmar raltlan te puala Fehchhuahna sum thehlut tawhin , ṬKP Day thawhlawm thehlut bial 85 leh ṬKP Ramthimni thawhlawm thehlut bial 88 an awm. Heng bakah hian MṬKP hnuaia Sub-Committee hrang hrang Secretary te hnen aṭangin an hmalak tawh dan leh hmalak mekna report ngaihthlak a ni bawk.

Meeting-ah hian thu pawimawh tam tak rel a ni a. Kum 2024-a MṬKP Rorel dawl turin ṬKP Gilgal Unit, Theiriat Pastor Bial thlan a ni. BCM Literature & Printing Committee thu chuak anga Chanchinbu chhut man a san dawn tak avanga Ṭhalai Entu lak man tih san chungchang te, Bial leh hmun hrang hrang aṭanga MṬKP-in sawmna a dawn te ngaihtuah a nih bakah, Mizoram ṬKP Rorel Vawi 69-na, February 17, 2023-a Tuipui 'D'-a neih tur agenda thlir lawkna leh thil pawimawh dangte relin ngaihtuah a ni bawk.