Mizoram Kohhran Hruaitu Committee chuan August ni 23, 2020 Pathianni Zan dar 7 hian Ram Pum Huapin Tawngtai Rualna neih a rel a. Mizoram Baptist Kohhran General Secretary pawhin BCM Kohhran chhung tinte thahnemngai taka he tawngtaina lo zawm ve turin a sawm bawk.
Kan hriat theuh ang in kan ram ah Covid-19 hri leng mek chuan ziaawm lam aiin zual lam a pan chho zel a, chutih rualin Pathian venna leh awmpuina avangin Mizoram chhungah Covid-19 avanga nunna chan kan la awm lo thung a.
Hemi chungchang hi Mizoram Kohhran Hruaitu Committee chuan ngaihtuahin August ni 23 Pathianni Zan dar 7 hian Ram Pum Huap Tawngtai Rualna neih a rel a. He thurel hi BCM chuan ngai pawimawhin, kohhran, mimal leh chhung tin ten he hun hi lo hmang a, lo zawm theuh turin Rev. F. Ramdinmawia, General Secretary chuan Kohhran mi te a ngenin a sawm a ni.
MKHC-in tawngtai thupui a siam tlangpuiah chuan - Mizorama Covid-19 avanga nunna chan kan la awm loh avanga lawmthusawina te, Covid-19 vei mekte leh enkawltute tan, Hripui avanga thihna kan tawh loh nan leh pathian venhimna kan chan zel theih nan, Damlo enkawltute leh thawktu zawng zawng tan te, Hripui a lo kian thuai theih nan leh Biak In atanga ngeia Pathian kan biak thuai theih nan, tih te ani.
