November 21, 2021 Pathianni khan Mizoram BMP Office Bearers leh Executive Committee member te chu kum 2023-a MBMP Inkhawmpui neihna tur Hnahthial ah an kal a, MBMP Inkhawmpui Organizing Committee te nena inkawmhona neiin, Inkhawmpui atana hmalakna te an thlirho.

MBMP hruaitu te hi mi 11 kalin, Hnahthial-ah hian Inkhawmpui Organising Committee ten an lo dawngsawng a, ruahmanna an lo siam sa ang in, MBMP hruaitu te hi pawl hnih ah inthenin BCM Venglai ah pawl khat inkhawmin MBMP President Rbt. Chawngrolura’n thu a sawi a, pawl khat dang te hi BCM Kanan ah inkhawmin, MBMP Secretary Rev. C. Chhuntluanga’n thuchah a sawi a ni.

Chawhnu-ah BCM Bazar Hall ah MBMP hruaitu te leh Inkhawmpui Organising Committee te hi inhmukhawmin, Rev. TC Vanlalmalsawma, Hnahthial South Bialtu Pastor leh Organising Committee Vice Chairman ni bawk in a kaihruai a, Organising Secretary Pu F. Lalbiakthanga hnen atangin MBMP Inkhawmpui 2023 budget atan cheng nuai 35 ruahman a nih thu te, Organising Committee bakah Sub-Committee 13 din a nih tawh thu te, Inkhawmpuina hmun atana Hnahthial Bazar Veng-a HBSC Football Field ruahman a nih thu te, Palai mi 3500-4000 beisei a nih thu te report ngaihthlak a ni bawk.