Mission Coordinator zin chhuak  :  Rev. B. Lalrinawma, Mission Coordinator chuan Mizoram chhim lama Missionary te thawhna hmun Parva, Nghalimlui, Vathuampui, Mautlang, Hruitezawl leh Ngengpuitlang te a tlawh kual mek. Apr. 9, 2014 khan a chhuak a, chawlhlehkar tir lamah Lunglei a lo thleng leh ang. Missionary damlote  :  1) Nl. F. Zoramthangi, Evan. Nurse (rtd.), Lunglawn chu Christian Hospital, Serkawnah Cancer avanga enkawl mek a ni. 2) Nl. C. Lalnghingi, ET, Bijoynandi, Tripura Field chu Christian Hospital, Serkawnah enkawl mek a ni bawk. 3) Nl. Vanlalzami Pachuau, ET, Nazareth Comp. H/S, Vathuampui chu Apr. 8, 2014  khan Christian Hospital, Lawngtlaiah a Rilphir zai chhuahsak a ni a, la enkawl mek a ni. Pathian tihdamna leh thlamuanna i dilsak ang u. Missionary Furlough :  1) Pi J. Laldampuii, ET, MEC, Ziro, Arunachal West Field chuan Apr. 5 – 13, 2014 hian Upper Republic Bial, Aizawlah 2) Pu Tuikhurliana, ET, Tuichawng, Chakma Mission chuan Apr. 6 – 13, 2014 hian Bungtlang ‘S’ Bialah 3) Pu L. Vanlalzuia, Evan. Supervisor, Rajbongsi Area, Bengal Field chuan Apr. 5 – 13, 2014 hian Lawngtlai ‘S’ Bialah Furlough programme an hmang a. Pathian malsawmna leh hruaina i dilsak ang u. Missionary te an lawm  :  BCM Mission Platinum Jubilee lawm tura an thawhna hmun atanga lo chhuak Missionary te chu Mar. 20 – 23, 2014 Lawmna pui ber Serkawna an tel hnuin, Mar. 28 – 30, 2014 khan pawl thuma in thenin Aizawl, Lawngtlai leh Hnahthial khawpuia Lawmnaah an tel zui a. Hei bakah hian an kohhran leh Biala Mission Convention-a Speaker-a tang te, kohhran ten programme hrang hrang an siamsak te an hmang hlawm bawk a. Kohhrante kan infuih angin kan ai awha Ramthima Missionary hna thawka feh chhuakte hi thilpek pek leh Parthi awrhtira chawimawi an ni a. Hreawm mahse, Lal Isua hminga hnung tawlh lo va, chhel taka hmalam pan zel tur an nih hriattira fuih an ni a, lawm avangin an mittui a tla zawih zawih hlawm a ni. Missionary chawimawina programme buatsaih a thatna chu kohhran mipui, a bik takin TKP leh KNP member-te mit hmuha Missionary nih ngaihhlutawmna leh Lal Isua leh Chanchin Tha avanga an hnathawh leh tuarnate hi kan hriatpui a ni tih puanzarna hian, a lo thlirtute thinlungah Missionary rilru a tuh thar a, Mission Meichher hi mit mai lovin a chhi kai zel hi a ni. A va lawmawm em! Lalpa’n ropuina chang rawh se! Tan i la zual sauh sauh ang u  :  BCM-in hnam dang zinga Chanchin Tha hril tur kan tirh chhuah kum 75-na, Platinum Jubilee kan lawm hi duh tawk mai lovin, Lal Isua’n khawvel zawng zawnga kal a, hnam tin hnena Chanchin Tha hril tura min kohna hi, Thlarau Thianghlim hruainain, i chhang zel ang u. Pathianin Josua hnena a lo sawi tawh ang khan, ram tam tak la tawh mah ila, rinnaa lak belh tur ram tam tak kan la hmabak a. Field neihsa 22 bakah 2 kan hawn belh leh tep a, Lalpa zema thlarau bote seng khawm a, Lalpa ram dina tizau zel tura kan beih zui zel a tul dawn. Tha thlah mai ngam chi a la ni lo. Mahni, Tawngtai leh Thilpekin Mission rawngbawlnaah hian tan i la zual sauh sauh ang u. Kaleba’n Hebron tlanga mi lian Anaka thlahte Lalpa chakna ringa a hnawt chhuak ang khan, kan Field-a ‘Anaka thlahte’ hi Lal Isua chakna hmangin i hnawt chhuak ang u. Hnehtu Lal Isuan kan hma a hruai zel dawn a, he rawngbawlna – a Mission chhunzawmna hna hi Amah ngeiin min thawhpui zel dawn (Mat. 28:20; Mar. 16:20) a ni. Missionary Address  :  Missionary Address, 2014 copy 1500 chhuttir chu a zo ta der mai. Chhut nawntir tum mek a ni. Ni tin kan Missionary te hi an hming lam ngeiin, i tawngtaipui ang u.

– Upa H.S. Lalhmingthanga, BCM Mission Promoter

 Read More Weekend News