March 8, 2021 (Thawhtanni) hi Mizoram Baptist Kohhran Nipawimawh, ‘Missionary Thlen Champha” a ni a. Kumin atana thupui thlan chhuah chu “Ka awmdan zirtute lo ni hlawm rawh u" (Philippi 3:17) tih a ni.
Mizorama Missionary hna thawk hmasaber (Pioneer Missionary) te, Sap Upa leh Pu Buanga ten kum 4 chhung Mizoram hmar lamah bul tana, hriatreng tlak thil ropui tak tak min tihsak hnu-in Mizoram an chhuahsan a tul ta si a.
Hemi hnu hian Sap ramah hawngin hmun dangah rawngbawla an awm ren rawn hnu-ah BMS lamin Mizorama thawk turin an sawm leh ta a. An duhthusam hmun ngei a nih avanga lawm taka pawmin kum 1903, March ni 8 ah Tlabung an lo thleng leh ta a. March ni 13 ah Lunglei lo lut lehin, Serkawnah an inbengbel ta a ni.
Hemi atang hian Mizoram chhim lama BMS rawngbawlna chu a lo in tan ta nghal a ni. Kum 1989, BCM Assembly rorelna chuan BMS in chhim lama rawngbawlna an rawn tan hun hi ngaihhlut leh hriatreng tlak ni a hriain, ‘Chhim lama Missionaryte thlen ni’ tiin Lunglei an lo luh ni chu Kohhrana thawktute chhuti ni (Office chawlh) atan, kum 1990 atanga hman tan turin a puang ta a.
Hun engemawchen hman anih hnu-ah, kum 1996 Assembly rorelna bawk chuan hei hi ngaihtuah nawn lehin, Missionary ten Tlabung an lo thlen ni chu Chhim lama Missionary thlen ni atan hman zawk ni rawh se, a tih angin,1997 atangin ‘Missionary thlen champha’tiin March 8 ni chu BCM Ni Pawimawh zingah a dah leh ta zawk a ni.
He ni puala hun hmang thei tur chuan thupui tarlan hmang hian thuchah sawi ni se, Tualchhung Kohhranin tha a tih angin Programme kimchang chu siam mai tur a ni.
