Tunkar Pathianni, July 6, 2014  hi Mizoram Baptist Kohhran ni pawimawh, “Missionary Sunday” a ni a. He ni hi kum tin, July Pathianni hmasa berah hman thin a ni. Kuminah pawh he ni pual hian Mizoram Baptist Kohhran chuan Biak In tinah Programme kan hmang leh dawn a ni. Kumin Missionary Sunday thupui-ah chuan “ Dak ulang, lote en rawh u” (Johana 4:35) hman a ni ang. He thupui hmang hian Pathianni zing inkhawm leh Zan lam Inkhawm-ah te thuchah ngaihthlak a ni ang. Sunday School lamah pawh Missionary Sunday Pualin thuzir inang tlang, Puitling leh Naupang lam Department-ah then a ni ang. Tin, Pathianni chawhnu-ah Tualchhung Kohhran a thei apiangin Mission lam pualin Inpawlhona hun buatsaih tura beisei an ni bawk.

Zoram Baptist Mission to bul :

Zoram Baptist kohhran hi a dintirh atangin Chanchin Tha hrilh hi a pianpui a ni kan ti thei awm e. Ringthar hmasate pawhin a tirte atangin ringlote Krista hnena hruai hi  thupui berah an nei tlat a. Thlarau Thianghlimin a thuama,  mizoram chhung chang ni lo, an chhehvel a mizo hnahthlak awm Bangla Desh leh Tripura a awmte an vei em em a ni. Ringtu hmasate zinga pastor  Rev. Zathanga pawhin  Miria, Bawm, Pang leh Lau awmna ram a fan thu  a thih hma khan a sawi thin. Kum 1918 khan Chanchin Tha hril tura inpete chuan Tripuraah lutin kohhran nghet tak an phun a, tun thlengin Tripura hnam hrang hrang tieng turin an pawimawh hle a ni.

Tichuan hnamdangte veina a lo lian zela,  Mizoram chhunga Tuikuk –Takam te veina a lo lian zel a, kum 1939 Charchar Assembly ,Thiltlang a neih chuan a ngaituah ta a, chutah chuan tirhkoh pahnih rawih rel thluin  Easter Sunday zing thawhlawm hi mission bik atan dah a rel nghal a. Tuikuk – tTakam puala thawhlawm hmasa ber tlingkhawm hi Rs.244/- chiah a ni. Tirhkohte hlawn atan Rs.11Pm an fixed nghal bawk. 

Ramthim veina a lo len zel tak avangin 11-12 July 1962 a Assembly Executive Committee chuan Ramthim Sub-Committee a din ta a. Kum 1963 ,June Executive Committee chuan Sub-Committee chu ding chhawm zel turin a relin 1966 thleng a ding chho nghe nghe. Kum 1966 chuan Account pawh a hrana vawng turin a rel zui a.

Damdawi lama rawngbawlna pawh tula hriat anih avangin  June 1963 khan Rotlang (W) Tuikuk zinga thawk turin Nurse Lianzami chu tirh ani a,  1964 khan amah thlak turin Nurse Vanlalnghaki tirh thlak leh a ni.  Ramthim rawngbawlnaah hian Education, Direct Evangelism leh Medical lama thuangthuma rawngbawl a ni.

Pastor bial hrang hrang atangin Ramthim lam ngaihtuahtu bik Committee din tul zia sawi anih avangin 17 -18 June 1966 Executive Committee chuan “Zoram Baptist Mission” (ZBM)  chu a din ta a ni.

Missionary Sunday to bul :

Kohhran Assembly rorelnain ramthim lam ngaihtuahtu bik Committee a siam hma pawh hian pastor bial thenkhat, Phawngpui bial, Tuithumhnar bial te chuan Matupui / Kampelet te, Mire ramte bei turin an bial huapa Committee dinin thuhriltute an tir a, Ringtu siamin an bial kohhranin an harh phah hle a ni.

Kum 1949 khan July Pathian ni hmasa ber zing thawhlawm hi Tuikuk-Takam pual atan Assembly chuan a ruat a. Hun engnge maw lai khan a khaihlak deuhva, kum 1975 khan tithar lehin he mi ni hi Missionary Sunday atan hman a lo ni ta a ni.

Kohhranhoten ramthim veina kan lo neih theih nan 1951 leh 1952 khan Tirhkoh pahnih  a inkawpin kohhran hrang hrang a tlawhkual tir a, hei hian kohhran te tiharhin Ramthim veina a neihtir nasa hle a ni. Tichuan vawiin thlengin he ni hi kan lo hmang chhawm ta zel a ni.

..........................................

BCM. MISSION WORKERS STATISTICS : JUNE 2014