Mizoram Baptist Kohhran chuan tun hnaia missionary a lak thar pahnihte chu Tunkar Pathianni, November 2, chawhma dar 10:00 khian Lunglawn East Biak in-ah a tirchhuak dawn ta. Heng missionary thar pahnihte hi Nl. Lalrinzuali, Ebenezer Kohhran, Serchhip leh Tv.R. Laltanpuia, Shalom Kohhran Lunglawn te an ni. Tirhchhuah inkhawm hi Mission Promoter, Upa HS.Lalhmingthanga’n a kaihruai ang a, General Secretary, Rev.H. Lianngaian tirchhuakin, AGS i/c Mission, Rev.Dr.K. Lalrinthangan thuchah a sawi ang.
Missionary Tichchhuah turte:
Nl. Lalrinzuali d/o Zoramthanga (L) hi Mizo nulaah chuan pumraw lian pawl tak, Serchhip Ebenezer Kohhrana lawi, thiamna lamah Hindi BA a ni a. Mizoram chhung Non-Mizo Evangelism rawngbawlnaah Evangelist-in a awm dawn a ni.
Tv. R. Laltanpuia s/o Upa R. Lalvena hi Lunglawn Shalom Kohhranah lawiin thiamna lamah BA, BD a ni a. Arunachal East field-ah Evangelist hna thawkin a awm dawn a ni.
He Missionary Tirhchhuah inkhawmah hian Upa T. Lalzika, Kanaan leh Upa K. L.Laldailova ten Bible an chhiar ang a. Shalom Kohhran Zaipawl leh Lunglawn Pastor bial zaipawlte bakah malzai pahnih, Nl. K. Lalnunsiami leh Nl. Bethsy Lalrinsangi te hnen atangin Pathian fakna hla ngaihthlak a ni bawk ang.
Missionary thar pahnihte hnen atangin Pathian kohna an chhan dan (testimony) ngaihthlak a ni ang a, bialtu pastor Rev.R. Lalbiakliana’n malsawm tawngtainain inkhawm a tin ang a. Inkhawm zawng zawng tan a dawltu Kohhran chuan thingpui ruai an buatsaih a ni.
.................................
BCM Missionary zat :
BCM Missionary zat hi kohhranhovin kan hre chak hle a. Hqrs. atanga hlawh la Missionaries/Native Substantive leh Temporary chin 336 leh Native (Contract) 234 an vaiin 570 an ni ta (Mar. 2014 khan 536 an ni). Missionary kawppui te, Recognized Missionary te, Mizo Volunteers leh Native Volunteers chu an vaiin 322 an ni a. Tichuan, an vaiin (a) 570 + (b) 322 = 892 (zariat sawmkua pahnih) an ni. Volunteers leh Private-a thawkte hi an in thlak deuh reng a, chuvangin, Mission Workers zat hi a danglam hlek hlek reng tih i hria ang u. (33 lak belh hnua kan pung vak lo hi Volunteers thawk lai Contract-a lak thar an tam vang a ni. Ed.)
Work Camp :
1) Lunglawn kohhran member 16 chuan Kalajara Saljhar, Dhubri Area, Assam Field-a Missionary Quarters an sa mek.
2) TKP Moria Unit, Rahsiveng member 19 chu Oct. 30, 2014 khan Basar, Arunachal East Field-a Biak in thutthleng siam leh rawng hnawih turin an chhuak.
3) Nov. 3, 2014 hian Kikawn kohhran chu Golasuri, Longpuighat Area, Chakma Mission Biak in sa turin an chhuak dawn.
4) Oct. 28, 2014 khan Zohnuai kohhran member 10 chu Lalkura, Dhubri Area, Assam Field Biak in sa turin an chhuak.
5) Nov. 5, 2014 hian Zohnuai ‘E’ kohhran chu Samuksuri, Tuichawng Area, Chakma Mission-ah hnathawh paha Chakma in hrang hrang tlawha rawngbawl tura chhuah an tum bawk. An tan i tawngtai ang u.
Mission Consultation :
1)Nov. 8, 2014 (Inrinni) hian Sap Upa leh Pu Buanga Hall, BCM Office, Serkawnah Lunglei ‘N’ lam Pastor Bial 4 – Rahsiveng, Bazar, Serkawn leh Zotlang Bial leh Bial Mission hruaitu ten BCM Mission hotute nen an nei dawn.
2) Nov. 15, 2014 (Inrinni) hian Chanmari Biak inah Lunglei ‘S’ lam Pastor Bial 4 – Electric, Chanmari, Lunglawn leh Theiriat Bial leh Bial Mission hruaitu ten BCM Mission hotute nen an nei thung ang. Mission rawngbawlnaa infuih tharna leh thli tul in hrilh fiahna hun hlimawm tak anih theih nan, Pathian hnenah i thlen ang u.
MTKP Hruaitute Assam Mission Field-ah:
Mizoram TKP hruaitu member 9 leh leh soloist, Nl. Rebeki Sailo te chu MTKP Organiser, Rev. Samuel Lalremsanga hovin Assam field huam chhung Rabha Area tlawh turin October 29, 2014 khan Lunglei an chhuahsan a, an programme ang chuan November 5-ah an lo kir leh tura beisei an ni. MTKP hruaitute hian Rabha Baptist Christian Union (RBCU) Thalai inkhawmpui an hmanpui ang a, Debitola leh a chhehvela missionary-te an tlawh nghal ang.
Apatani Thuthlung Thar Bu ‘release’ :
Oct. 23, 2014 (Zirtawpni) khan kum 15 chhung zet kan lo buaipui tawh Arunachal West Field-a Apatani hnam tawnga Bible – Thuthlung Thar, Bible Society of India (BSI) kaihhruainaa lehlin chu, BSI hotu Rev. Jamir-an Town Church, Hapoli, Ziro-ah Pathian ram zau nan a tlangzarh (released) ta.
