July 7, 2020 (Thawhlehni) chawhma dar 9:30 khan Mizoram Baptist Kohhran chuan BCM Hall, Serkawn, Lunglei-ah Missionary Tirhchhuahna buatsaihin he hunah hian Missionary 10, mipa 3 leh hmeichhia 7 tirh chhuah an ni. Heng Missionary tirhchhuah te hi AICS-ah kum khat Training kum 2019 khan neiin tha taka an training nei zo tawh te an ni

Hun pangngai-ah chuan Missionary Tirchhuahna hi Pathianni zing Inkhawm hun pangngai ah Tirhchhuah Inkhawm hi buatsaih thin a ni a, tun tum ah erawh chuan Covid-19 in kan ram min tih buai avangin Sawrkar Dan siam bawh chhe lovin he programme hi buatsaih a ni a, Kohhrana thawktu thenkhatte leh Tirhchhuahte bakah anmahni tawiawmtu chhungkaw aiawh leh hun hmangtu te nen he hun hi hman a ni ta a ni.

Tirhchhuahna hun hi Rev.R.Lalthangliana, Mission Coordinator-in a kaihruai a, Upa HL Liantluanga, Mission Coordinator-in Missionary tirhchhuah turte hmelhriattirna leh BCM-in missionary a mamawhna te a sawi a, Tirhchhuah turte atangin an Testimony tawi ngaihthlak zui a ni bawk.  Rev.F.Ramdinmawia, General Secretary-in missionary te hi tirchhuak in, Pathian Lehkhabu  (Bible) a hlan nghal bawk. Missionary tirhchhuah tharte Pathian hnena hlanna leh an tana tawngtaisakna Rev. R.Lalbiakliana, AGS Service-in a nei zui nghal a ni.

Rev. Dr. C. Vanlaldika. AGS – Mission-in Tirhchhuah te pualin Pathainthu a sawi a, Rev. Lalremsiama Ralte, Worship & Music Department Director-in Malsawm tawngtaina-in hun tawp a khar a ni.

Missionary tirhchhuah te hian July thla atang hian an hna an zawm ang a, Mizoram chhung (Home Mission)-a thawk tur te hi an awmna pana kal nghal tura ruahman niin, Mizoram pawn, State danga kal turte chu hrileng avanga inkhuahkhirhna a kian hunah an awmna tura ruat ah an kal thung ang, an awmna tura an kal theih hma chuan Ramchhung Mission-ah an thawk rih dawn a ni.

Hengte hi Missionary tirhchhuahte leh an awmna tur a ni:

Sl.No	Name	Pa hming	Lawina Kohhran	Thawhna tur
1.	A.Lalhmingsangi	A.Lalsanglura	Venglai, Lunglei	Tripura(St.James H/S)
2.	B.Lalzawnpuii	B.Ngurtinkhuma	Mualcheng S	Marpara ‘S’
3.	C.Lalruatpuii	C.Lalhuaia	Bazar, Hnahthial	Damparengpui H/S
4.	PC.Saitluangi	PC.Lalrina	Zobawk, Vengthar	BMS M.Kawnpui
5.	R.Laldinpuii	R.Lalduha	Chanmari, Lunglei	BCM Zawlpui
6.	R.Lalmuanpuii	R.Lalthanzuala	Armed Veng S	BMS Tuichawng
7.	Esther Lalkhawngaihi	B. Lalremthanga	Chawntlangpui	Vathuampui H/S
8.	TC.Lalremruata	Hranglawma	Bungtlang	Putlungasih
9.	C.Vanlaltlanchhuaha	C.Lalnunnema	Zobawk Bazar	A.P East
10.	FC.Lalhruaizela	F.Lalsiamkima	Sazaikawn	Tripura