Tunkar Pathianni, July 1, 2018 hi Mizoram Baptist Kohhran ni pawimawh, “Mission Sunday” a ni a. He ni hi kum tin, July Pathianni hmasa berah hman thin a ni. Kuminah pawh he ni pual hian Mizoram Baptist Kohhran chuan Biak In tinah Programme kan hmang leh dawn a ni. Kumin Mission Sunday thupui chu  “Ka tirh che u hi”( Johana 20:21) a ni ang. 

Sunday School lamah pawh Mission Sunday Pualin thuzir inang tlâng zir a ni ang. Tin, Pathianni chawhnu-ah Tualchhung Kohhran a thei apiangin Mission lam pualin Inpawlhona hun buatsaih tura beisei an nih bakah Zan lam Inkhawm pawh hemi puala hman tur a ni bawk ang.

Read More>> Mission Sunday lo chhuah dan

..............

BCM MISSION HMALAKNA

- Upa HL Liantluanga, Mission Promoter

Thuhmahruai:

Mizoram Baptist kohhran chuan kum tam tak  chhung  chu Mission rawngbawlna hi kan lo kalpui ve ta reng mai. He rawngbawl hna pawimawh tak mai kan thawh mek hi BCM mission a ni ngawt lova, a hmanrua zawk niin,Pathian Mission (Mission Dei) a ni tih hi hre thar le hang u. Chumi a nih avang chuan tun aia nasa zawk hian mahni hmun theuhah mahni theihna sang ber hlan zelin Kan Pathian hming ropuina tur leh a ram zau zel nan tan la thar leh theuh turin kan han in sawm thar leh a ni. Tun din hmunah hian Pathian khawngaihna ropui tak avangin Ramthim lamah kan theihna sang ber hmangin kan thiam dan hrang hrang hmangin rawngbawlna kan kalpui mek a ni. Mission Field kan han tih hmun hrang hrangah Direct Evangelism hmangte, Education hmangte Training dang Music, Tailoring centre leh Medical hmangten rawngkan bawl mek a ni. Kan tun dinhmun han thlir hian kan rawngbawlna hi chawlhsan emaw, inthlahdahsan thei emaw kawng danga pensan thei emaw hi kan la ni lo a ni tih hi I hre thar bawk ang u. Kan tun dinhmunah hetiang hian hmalak mek a ni a, kumin January to June  thla chhunga kan dinhmun nen han tarlan kan tum dawn a ni.

  RAWNGBAWL DAN: 1) Direct Evangelism:

Kan ram chhunga kan tawng hmang ve te leh a hrethiamte hnenah te, Mizoram pawn leh Foreign lamah te tawng hrang hmang te in Chanchin Tha midangte hnenah hriattirin mite Krista hnena hruai turin Chanchin Tha chu tawngka, chetzia leh nunphung leh a theih dan ang angin  chanchin Tha hril a ni.  Hemi atan hian tunhmaaa tirhkoh kan tih thin ang khan Evangelist ten an thiam ang angin Chanchin tha an hril a, hei hi Direct Evangelism rawngbawlna tih a ni. He rawngbawlna hi a hlawkin ringthar kan hmuhna hnar ber pakhat leh Kohhran thar kan neih thinte hi a bul a ni kan ti thei ang. A bik takin Arunachal East, Arunachal Far East, Jharkhand, Madhya Pradesh leh Maharastra, Bhutan  Field-ah te  leh Mising area Arunachal west Field ah te leh Rajbhongshi area leh  Sikkim Area, West Bengal Field-ah te hian he rawngbawlna hi kalpui a ni.

2) Indirect Evangelism:

Midangte Krista hnena hruai turin Education hmangin Schoolah te, Music Centre, Tailoring Centre leh Training chi hrang hrang hmangte in rawngbawlna kalpui mek a ni bawk a ni. Tunah hian Kan partnerte nena kan inenkawl tawmte  tel miah lo hian Mission school 53 enkawlin Tailoring Centre  5 kan nei a, Music zirna hmun hnihah kan nei bawk. Heng bakah hian a tul dan a zirin House, Cottage fellowship leh leadership training, healing Ministry hmangtein  midangte Krista ke bula hruai turin hma lak mek a ni. Mihring nun pumpui tihhmasawnna ( Personality development) hi education tum bulpui ber ni mahse, Mission Field-ah erawh kan tum lian ber zawk chu Heng zirna, centre dangte hmang hian Midangte Krista hnena hruai hi a tum lian ber a ni zawk a ni. Heng zawng zawng hi kan tum ram kan thlenna tura a hmanrua (means to an end) mai zawk tih pawh hi vawiin Mission Sunday kan hman atang hian kan pawm thar leh pawh hi a tul tak zet a ni.

3) Medical Hmangin:

Lal Isua he khawvela a len lai khan tihdam rawngbawl hna hi a ngaih pawimawh zing ami a ni a. he rawngbawl hna pawimawh tak hi Mizoram Baptist Kohhrante pawhin a tulzia hriain Mission Field-ah tihdam rawngbawl hna kalpui mek a ni bawk a ni. Tunah hian Evangelist Nurse hi 21 kan nei a, Anni hian Clinic te neiin Damdawi dawrte pawh an nei nghal bawk a. Pathian khawngaihna ropui tak avangin School kan neihna Hostel neih kawpna ang chiah chuan Nurse ten an thut chilh reng bawk a ni. An rawngbawlna hi School naupang Hosteller mai bakah midangte pawhin an chhawr em em a. vanneih thlak tak in BCM.Relief & Development kaltlangin Thiamna sang zawk kan nurse leh thawktu dangten an neih belh theih nan Thisen, Zun atanga natna hmuh chhuah a nih theih nan trainingte neiin Microscope leh a hmanraw dangte pein tangkai takin kan nurse ten hmangin clinic an enkawl phah thei a ni. Nurse te hian uluk taka tawngtaina nen damlote an lo enkawl thinna hian rah tha tak chhuahin midangte Krista ke bulah hruai an ni bawk thin a, rawngbawlna tangkai tak a ni.

Thlaraubo pakhat man nan hian a sum zawnga chhut chuan sang tak a ni mai thei a, Nimahsela, Mission Field hi a rei zawng emaw, a sawt lo zawnga chhut chi pawh niin alang lo. Chumi a nih avang chuan kan theihna sang tak pein Lalpa ram tan kan bei zel ang tiin tawngtai, thilpek, work camp, FGield Visit te hmang hian I bei leh sauh sauh ang u.

A chunga kan sawi bakah hian missionary ten an chenna hmun milin tawngkaa Lal isua chanchin an puan theih lohna hmunah kawng hrang hrang hmangin rawngbawlna hi an kalpui bawk a ni. Tun tumah chuan an rawngbawlna hmanraw hrang hrangte hmunin a daih dawn loh avangin kan tarlang seng vek dawn lo a ni. Amaherawh chu Kumin 2018 January to June thlenga kan rawngbawlna report erawh han tel hram ta ila hetiangin.

Sl.No	Mission Field	Ringthar	Kohhran thar	Kohhran Member zat
A	MIZORAM
1.	Mission	50	1	6,100
2.	Bru Mission	196	1	23,406
3.	Non Mizo Mission	8	nil	886
B.	MIZORAM PAWN(INDIA)
4.	Tripura	573	3	97,530
5.	MP& MS	-	-	660
6.	Arunachal East	110	1	13,914
7.	Arunachal West	35	-	89,500
8.	Arunachal Far East	147	2	7,317
9.	Assam	77	-	15,019
10.	West Bengal	47	1	1,955
11.	North India Mission (Delhi)	172	5	14,973
12.	Jharkhand	80	1	1,536
C	INDIA RAM PAWN
13.	Nepal	9	1	1,193
14.	Bhutan	nil	1	190
15.	Miria, Bangladesh	59	-	771
16.	Arakan,Myanmar	20	-	155
17.	Ghana	N/A	N/A
18.	Kenya	N/A	N/A
19.	Thailand	N/A	N/A
20.	Indonesia	N/A	N/A
21.	Cambodia	N/A	N/A	N/A = Not Applicable
	TOTAL	1,560	17	275,081

Note: India ram pawn a, kan rawngbawlna hi Partner nei kan ni a, ringthar kan nei a nih pawhin kan partner ten an chhiar thin avangin keini hi chuan member thar kan neih hi kan chhiar ve thin lova, chuvangin ringthar report leh thil dang hi kan dah awl ta thin a ni.