#Arunachal East Field huamchhung Riga hmun ah Biak in thar hawn a ni.
September 29, 2022 khan, Arunachal East Field, Riga Biak In thar chu Field Director in a hawng. Riga hi Thingtlang khaw lian tak niin In 400 chuang awmin Adi Thingtlang khaw lian ber a ngaih a ni. Kohhran hi an la fahrah hle a. Chhungkua 10 vel niin Biak In sak nan hian theihtawp chhuahin hnatlang an thawk a. Bik In sak nan hian cheng nuai 6 chuang hman niin, Field atangin cheng singthum a tanpui ve an ni. An mahni kutkawih ngei a biak in an din hi an lawmpuiawm hle.
Hetihlai hian October ni 2, Pathianni khan Arunachal East Field huam chhung hmun hrang hrang ah mi 12 in ringthar baptisma an chang bawk a ni.
#Nari Cicle women Dept Join Fellowship hmasa ber neih a ni
September 30, 2022 (Zirtawpni) khan Arunachal East Field, Nari Cicle women Dept Join Fellowship vawi khatna chu Lumpo Kohhranah neih a ni a. Member 100 chuang kal khawmin hun hlimawm tak hman a ni. Field Director Rev. Lalsangzuala Sailo chu Speaker niin thuchah a sawi a, zan lamah Ruai kilho nghal a ni.
#Madhya Assam Baptist Christian Endeavour leh Sunday School Union te buatsaihin Thalai Pual Camping neih a ni.
Tunkar Thawhlehni atanga Ningani (October 4-6) chhung khan Madhya Assam Baptist Christian Endeavour leh Sunday School Union te buatsaihin Thalai Pual Camping chu Diljan Baptist Church, Golaghat-ah neih a ni a. Speaker-ah Rev. HS Lalramnghaka, Field Director, Upper Assam Field leh Missionary C. Lalramnghaka te an hmang. He Thalai Pual Camp-ah hian thupui-ah “Khawiahnge i awm” (Gen 3:9) tih hman a ni a, Speaker te hnen atanga thuchah ngaihthlak thin a nih bakah Fakna inkhawm neih thin a ni.
Camping-ah hian mi 300 chuang lutin Christian ni lo, sakhaw dang betu zing atang pawhin Camp-ah hian engemawzat an lut a ni.
#Mishing area ah UMBC Youth sport and cultural meet an hmang.
October 3-5, 2022 chhung khan Mishing area ah United Mishing Baptist Convention, Youth department chuan sport leh cultural meet an hmang a, meet-ah hian thalai 250 vel an kal. UMBC Compound, Silapathar ah hun hmangin, Speaker ah Upa J. Lalrokima, BCM missionary hman a ni.
#Mire rama Missionary – Pu Rosanglura Fanai lehkhabu ziak ‘Ka Hringnun leh Miri ate khawvel’ tih chu tlangzarh a ni.
October 4, 2022 (Thawhlehni) khan BCM Hall, Serkawnah Missionary Pu Rosanglura Fanai, Mire ram, Bangladesh a missionary thawklai lehkhabu ziak ‘Ka Hringnun leh Miria te Khawvel” (revised & enlarged) chu Rev. Dr. R. Lalthanmawia, AGS Mission-in a duh apiang te lei leh chhiar theih turin a tlangzarh.
Lehkhabu Tlangzarhna ah hian Pu Rosanglura fanai-in a lehkhabu ziak dan leh a chhunga a thu awm tlangpui te tarlangin a sawifiah a. Rev. Dr. R. Lalthanmawia’n tlangzarhin Lawmthusawi tawngtaina leh lehkhabu hlanna a nei a ni.
He lehkhabu-ah hian a ziaktu chanchin tlangpui, a naupan lai atanga Missionary a a kal dan te, harsatna leh lawmna a tawn te leh Pathian hruaina a chan hrang hrang te, Mire hnam chanchin leh an nunphung mak leh ngaihnawm tak tak te, Mire hnam zinga an rawngbawl dan leh an Kristian nun thanlen mek dan te ngaihnawm takin a ziak a ni. Lehkhabu hi phek 380 a chhah niin BCM Bookroom leh Lehkhabu dawr hrang hrangah cheng 300/- a lei theih a ni.
Galo Baptist Union-ah Mission Sunday hman a ni.
October 2, 2022 (Pathianni) khan Galo Baptist Union chuan Mission Sunday an hmang a, October Pathianni hmasa ber hi Mission Sunday atan a hman thin ani. Thawhlawm te Hqtrs a thehlutin Mission rawngbawlna nan a hman ani.
