Mission Platinum Jubilee chu March 20-23 khan Serkawnah ropui taka lawm a ni tawh a, he Jubilee hmanga lo kal - Missionary thenkhat leh Mission Field atanga lo kal (Native Group) te, Foreign leh India ram hmun hrang hrang atanga lo kal - mikhual pawimawh - BWA, BMS, GIA, Korea, etc.. atanga lo kal te pawh anmahni hmun lam panin an haw ta a. Missionary tam zawk te erawhchu la chambangin tunkar tawpa Mission Platinum Jubilee lawmna tur - Aizawl, Lawngtlai, Hnahthial-ah te an tel chhunzawm dawn a ni.
Kan tarlan tawh angin March 28-30, 2014 hian Aizawl, Hnahthial leh Lawngtlaiah te Platinum Jubilee lawmna hi chhunzawm tur a ni a; heng bakah hian kan hriat theih chinah Tlabung, Chhipphir, Mamit leh Shillong-ah te bial huapin lawm an tum a, tin Tualchhung Kohhran engngemawzatin tunkar Inrinni hian ruai nen he Jubilee hi lawm an tum bawk.
Aizawl-ah:
Aizawl-ah chuan March 29(Inrinni) zanah dar 7:00-ah Vanapa Hall-ah hawnna Inkhawm (Opening Ceremony) neih a ni ang a, Pathianni chhun dar 11:00-ah AR Lammual-ah lawmna pui ber hun hmangin Pathianni zanah Vanapa Hall-ah chhunzawm a ni ang. Aizawl-a MIssion Platinum Jubilee Programme hi Rev. Dr. K. Lalrinthanga, AGS i/c Mission-in a hmanpui dawn a, MIssion Field hrang hrang atangin Missionary engngemawzatin an hmanpui bawk ang. (Download Detailed Programme)
Lawngtlai-ah:
Lawngtlai-ah chuan March 28 zanah Local Church tinin an lawina Biak In theuhah Mission Platinum Jbilee pualin hun an hmang ang a. March 29 (Inrinni) atangin Lawngtlai Area huapin a lawman pui ber chu Lawngtlai Bazar Biak Inah neih a ni ang a. Zing dar 10:00-ah Platinum Jubilee lungphun (Monument) hawn a ni ang a, Rev. H. Lianngaia, General Secretary, BCM-in a hawng ang. Dar 10:15-ah Bazar Biak-inah Jubilee lawman Inkhawm a awm ang a, Chawhnu lamah Inpawlhona (Fellowship) neiin zan lamah pawh Lawngtlai Bazar Biak Inah hian lawman inkhawm buatsaih leh a ni ang. Pathianni Programme ah hian Lawngtlai khawpui chhunga Kohhran zawng zawng chu Bazar Biak Inah hian in chhungkhawmin Biak in an khar dawn a ni. (Detail Programme). Lawngtlai-a Platinum Jubilee lawmna-ah hian Missionary thahnem tak an tel dawn bakah Headquarters atangin Rev. H. Lianngnaia General Secretary hovin engngemawzat-in an telpui ang. (Download Detailed Programme)
Hnahthial-ah:
Hnahthial-ah chuan March 28 zan atangin Mission Platinum Jubilee lawmna hi Hnahthial Bazar Biak Inah neih a ni ang a, zan dar 7:00-ah inkhawm tan a ni ang. A tuk, March 29-ah Vantlang inkhawm nei lehin Missionaryte chawimawina hun hman a ni ang a, chawhnu lamah Fellowship Progamme neiin tlai lamah Missionary te chawhlui kilpuina, Venglai Kohhran-ah neih a ni ang. Inrinni zan, pathianni chhun leh zanah te pawh a hmun ngai-ah vek hian Platinum Jubilee lawmna hi neih a ni ang. Hnahthial Programme hmanpui tur hian BCM Missionary engngemawzat an kal dawn a, Headquarters atangin Rev. Lalbiaksanga Chinzah, AGS i/c Service bakah Mission Workers ten an tawiawm bawk ang. (Download Detailed Programme)
