Baptist Church of Mizoram

Mizoram Baptist Kohhran-in Chanchin Tha hril-a Ramthim a sut atan atanga kum 75-na (Mission Platinum Jubilee) chu karleh March 20-23 leh March 28-30, 2014 ah te Serkawn, Hnahthial, Lawngtlai leh Aizawl-ah te ropui taka lawm tumin inbuatsaihna a kal chho mek zel a. tunah chuan a hmawr bawkna leh a hmunhma cheibawl chiah hmabak a awm ta.

Inbuatsaih dan:

Mission Platinum Jubilee atan hian kawng hrang hrangin inbuatsaih a ni a. Jubilee hriatrengna thil hrang hrang - Platinum T-Shirt, Missionary Photo Album, Mission Compendium (lehkhabu) bakah Souvenir dang pawh buatsaih niin tunah hian engngemawzat chu hralh theih leh hralh mek a ni a. Tin, Main Celebration neihna tur - BCM Mual, Serkawn-ah Pandal mawitak leh danglam tak sak chhoh mek a ni a, Aizawl, Lawngtlai leh Hnahthial-ah pawh inbuatsaihna kalpui mek a ni.

Tute nge lo kal dawn?

He hun ropui tak hmang tur hian Missionary te chah chhuah mek an ni a, tunah hian a rammi (native) group leh missionaryte pawh he hun hmang tur hian an inpuahchah diam tawh a ni. Mizoram leh Mission Field atangin Zaipawl tha leh mimal zaithiam tak tak he Programme-ah hian telh niin rawn tihhlawhtlin an tum a ni. Tin, he hun rawn chhim tur hian khawpui chhung Kohhran member te chauh ni lovin, Pastor bial hrang hrang atangin palai pahnih theuh kal tura beisei an ni bakah Zoram hmun hrang hrang atangin kohhran mite a duh apiang he hun rawn hmang tur hian beisei leh sawm kan ni.

Speakers:

Mission Platinum Jubilee ah hian Foreign atangin Speaker tur chah chhuah an ni dawn a. Rev. Dr Fausto Vasconcelos - Director of Mission, etc. BWA te, Rev. Jeff Taylor - BMS Former President te, Rev. Rodger Drew - Ministries Director, Global Interaction (GIA) Australia te an lo kal dawn a ni.

Hriat tur pawimawh te:

BCM Mission Platinum Jubilee, Kohhran pumpui huapa lawmna (Main Celebration Programme) hi Serkawn-ah neih a ni ang a.
Jubilee Lawmna Main Celebration Programme hi Missionary Conference nen a rualin March 20-23, 2014-ah hman tur a ni.
Thupui atan “Lalpan thil ropui takte min tih saka kan lawm hle a ni” Sam 126:3 thlan a ni.
Missionary te chah chhuah vek an ni ang.
March 29-30, 2014-ah Aizawl (Aizawl Programme) Lawngtlai (Lawngtlai Programme) leh Hnahthialah Jubilee lawmna inkhawm hi buatsaih a ni bawk ang a.
Hnahthial-ah chuan North leh South Pastor Bial-in Joint Committee dinin mawhphurhna an la ang.(Hnahthial Programme)
Aizawl, Lawngtlai leh Hnahthialah te hian kan missionary te sem darh tur an ni ang a. Celebration programme-ah hian chanvo pawh a tam thei ang ber missionary te pek ni se, Celebration Committee-in hei hi tha an tih anga tihhlawhtlin dan lo ngaihtuah se la.
Kan missionary lo chhuak zawng zawngte hnenah hian Jubilee gift pek theuh tum ni se, Main celebration programme-a pek tur hi a thlengtu bial leh headquarters inbiak ni se, Aizawl, Lawngtlai leh Hnahthial-ah hian Organizing Committee-in a ngaihtuah ang.
BCM Recognized Missionary-te pawh an mahni sen so-a lo tel tura sawm ni se.
Jubilee pual hian Mission Compendium peih hman tum ni se. Hei hi Headquarters lamin mawh an phur ang.
Tualchhung Kohhran, Main Celebration programme (March 20-23, 2014 Serkawn) leh March 29-30, 2014 Aizawl, Lawngtlai leh Hnahthial-a tel ve remchang lote tan March 22, 2014 (Inrinni) ah mahni tualchhung Kohhran theuh-ah Jubilee lawmna programme siam ve ni se. Jubilee lawmna ruai pawh theh thei chuan theh hram tum ni se.
Platinum Jubilee hriat rengna mawi taka ziak Headquarters Mission Compound-ah tar ni se. Tualchhung Kohhran pawhin Jubilee hriat rengna ziak Biak in-ah emaw a remchan dana tar theuh tum ni se.
Kum 2014 Assembly, ABC leh Bial Inkhawmpui thupuiah leh Beirual Thuzir turah te Mission lam hawi thlan ni se.
Mission lama BCM in kan rawngbawlpui (Partners) eg. BWA, BMS, GIA, SIM, etc. sawm ve ni se.