YAZALI YOUTH CAMP :
Nov. 7 – 11, 2012 a Yazali Town Baptist Church Thalai Salvation Camp Mission Promoter Speaker-a hmanga neih chu a hlawhtling hle a. Campers 145 zinga 119 ten an thinlungah Lal Isua Lal leh Chhandamtuah lalutin sawmna an chhang a, Nov. 11, 2012 Pathianni tukah heng zinga kum 14 tling chin mi 17 (mipa 5 leh hmeichhia 12) ten Baptisma an chang. Rev. Laltanpuia Colney, FD, Arunachal West-in Baptisma leh Lalpa Zanriah programme hi a neihpui. Kan tawngtaina chhangtu Lalpa chu fakin awm rawh se! Lawmthu i sawi ang u.
AGENT INHMUHKHAWM DAWN:
Nov. 17, 2012 Inrinni hian Lunglei khawpui chhunga Missionary Tlangau Agent te Sap Upa leh Pu Buanga Hall, BCM Hqrs. Office-ah ko khawmin Infuih tharna leh hmasawn zel dan tur te leh Silver Jubilee l;awm dan tur te an sawiho dawn a ni. Missionary Tlangau hi 1989 khan chhuah tan a ni a, nakum 2013 hian a kum 25-na Silver Jubilee lawm a tum a ni.
ZERO, TUICHAWNG CHAKMA CAMP :
Nov. 21 – 25, 2012 khian BCM Lunglawn (Mission) chuan Zero, Tuichawng Chakma kohhran tan Salvation Camp a buatsaihsak dawn a, Speaker atan Pu Jamadon, Evan. Udalthana, Chawngte Circle Chakma Team Speaker hmangin, an Team hian rawng an bawl dawn a ni. Camp hlawhtling tak an neih theih nan i tawngtaipui ang u.
MUSIC TRAINING LEH CAMP :
Nov. 15 – 17, 2012 hian Rake Baptist Church, Bula, Ziro, Arunachal West chuan Music Training, Pu Vanlalhluta Sailo, MT (Hapoli, Ziro), Resource Person-a hmangin, Nov. 22 – 24, 2012 hian Salvation Camp, Pu FP Lalthathanga, Evan. (Bula, Ziro) Speaker-a hmangin an nei dawn a. Programme hlawhtling tak an neih theih nan i tawngtaipui ang u.
MISSIONARY FURLOUGH :
i) Pu K. Lalzuimawia chuan Nov. 3 – 14, 2012 chhung hian BCM Khawruhlian Bialah Furlough programme a hmang mek. Nov. 21, 2012 hian BCM Chhipphir Bialah a chhunzawm ang.
ii) Pu B. Khawtinkhuma chuan BCM Luangmual Bial, Aizawl fang zovin, Nov. 10 – 14, 2012 hian BCM Lawngtlai ‘N’ Bialah Furlough programme a hmang chhunzawm dawn. Kan Missionary te kal tlanga kohhran an tlawhten malsawmna an dawn theih nan i tawngtaisak ang u.
WORK CAMP :
Nov. 21 – 24, 2012 chhung hian BCM Electric (Mission), Lunglei member 20 vel chuan BCM English Medium School, Zawlpui Work Camp-in an sak sak dawn. Hlawhtling taka an thawh theih nan i tawngtaisak ang u.
KAWRPUICHHUAH TLAWH :
Nov. 18, 2012 Pathianni hmang hian BCM Zodin, Tlabung chuan Kawrpuichhuah Chakma kohhran an tlawh dawn a, P/Pastor Malsawmzuala, Tlabung Speaker a ni ang. Tun hnaia mi 148 laiin Baptisma an channa helai hmun hi Tlabung kohhran hrang hrangte khuan a in chhawka tlawhin, Pathian thutakin an chawm zui reng a, an fakawm tak zet a ni.
G.T.C BIAK IN, PASIGHAT :
Kumin May 26-a Adi Donyi-Polo hovin an thiatsak Pasighat-a Gram-Sevak Training Centre (GTC) Biak in chu Arunachal sorkar (Pasighat D.C) in phalna (Land Allotment) a pe ta a. Nov. 13, 2012 khan maurap Biak in hnatlangin an sa leh ta. Pathian thiltih mak ni ngei tur a ni, Biak in thiatsaktu 8 hi an lo thi tawh a; Biak ina Kross khawih chhetu phei chu a tuk May 27, 2012 khan a thi nghal hmiah! (source : FD, AP East) Tun tuma an Biak in sak hnatlang hi Arunachal Education Minister-in Rs 50,000/- laiin a tanpui a ni. Amah ringtute humhalhtu Lalpa hnenah lawmthu i sawi ang u.
