#Cyclone-in Biak In tichhia:

Tûn lai ruahsûr avâng khân kan missionary-te awmna hmun thenkhatah Thli leh Ruah nasa taka thawkin Biak In tihchhiat a nei nual hlawm a ni. Chûng zîngah chuan PC.Lalsangliana awmna, Tangpui, Tripura Field chu an Biak In luah lai Thli leh Ruahin a tihchhiatsak avângin inkhâwmna nei lovin an awm. A theih dân ang angin kan Missionary hian arrangement siamin ama chênna Quarter-ah an inkhâwm rih a ni. Biak In han tung ding leh mai tûrin kohhranho an la chênbeh ve si a, kan missionary lû a hai hle.

#MBKHP-in Missionary dam lo kan:

Mizoram Baptist Kohhran Hmeichhe Pâwl (MBKHP)-te chuan tûn hnaia Missionary Damdawi In-a inenkawl leh Missionary Nupui Damdawi In-a inenkawlte hnênah tanpuina an pe. Chûng Damlo, tanpuina an pêkte chu- Pi S. Lalfakhluni, E/T, Matisora, Chaka Mission, Pi Lalruatfeli W/o Pu Zaithanpuia, M/T, Arunachal Far East, Pi Lalrinpuii W/o Pu Zothanpuia, Evan. Arunachal East Field. MBKHP-te hian hêng kan Missionary Damlote leh Missionary Nupui Damlo tanpuina hi tûn hma atanga an lo kalpui tawh, an la kalpui mêk a ni. Hetiang rawngbâwlna damlohna tâwkten an lo dawng thei hi MBKHP-te chungah an lâwm takzet a ni.

#Transformer thar nei:

Baptist Boarding School Chawngte compound-a hman tur Transformer thar BBS-in an nei ta. He Tranformer thar hi Pu Joseph Lalhlimpuia, Parliamentary Secretary thahnemngaihna azâra nei an ni. Remchâng hmasa berah School Compound-ah hian hman theih tûra bun thuai tum a ni.

#Baptisma chang dawn:

Jharkhand Field Lokpur hmunah vawiin hian Baptisma chan programme an huaihawt a, Hun rei tawh tak atanga an lo ruahman tawh a ni a, Hlawhtling taka Baptisma chan Programme pawh an hman beisei a ni. Ringtu la ni ngai miah lo atangin Mi 4 Baptisma chang tûr beisei a ni. Baptisma hi Rev. T.C.Vanlalmalsawma’n a chantîr dâwn a ni. Hemi rual vêk hian Good News lama kan mIssionary Pu Lalchhanhima area-ah Baptisma chan programme buatsaih a ni bawk. Hetah pawh hian beisei anga an lo kal thei a nih chuan vawiin hian mi 4 Baptisma chantîr an ni bawk ang. Chhana hi Good News-te nêna kan thawhhona hmun Nalbari, Assam-a awm a ni.

#Missionary-Esther Zothansangi Pa thlahliam a ni ta:

May 31, 2017 (Nilaini) tlai dar 5:30 vel khan kan Missionary Nl Esther Zothansangi  pa, Pu. R. Thanzuala, BCM Farm Veng, Lunglei,  chuan Chatuan ram min pansan ta.. Esi hi Mt. Olive English School, Debitola-ah thawkin tunlai hian Furlough Deputation programme hmangin a rawn haw lai a ni a, Rahsi veng bial, Thingsai bial leh Farkawn bial te tlawhin  hun a hmang zo a, Field lama let leh turin a in buatsaih a, mahse a pa hi a dinhmun a hniam tak em avangin hruaitute phalna in a cham  ta rih a, a pa a dawm hlum ta a ni.  Nimin, June 1, 2017 (Ningani) khan Farmveng thlanmualah ropui taka thlahliam a ni. Nl. Esther Zothansangi leh a chhungte Lalpa awmpuina leh thlamuanna an chan zel theih nan Kohhran hoten i tawngtaipui ang u.

#Missionary Pu Ngurthankhuma Sailo- Pension ta:

Mizoram Baptist Kohhran Mission Department hnuaia Missionary thawhhlawk leh tangkai tak,  Pu Ngurthankhuma Sailo, Area Supervisor, Marpara Area chu May 31, 2017 khan Pension-in a chhuak ve leh ta.

Pu Ngurthankhuma Sailo hi Pu Lalsangluaia (L) leh Pi Zokaii(L) te inkarah May 1955-ah a piang a, a nupui Pi Vanlalzami nen fapa pakhat an nei. Kum 1988-ah ama thahnemngaihna-in Marpara-ah hian rawngbawlin a lut thla a. Marpara Area-ah Chakma Kohhran te tan sulsutu pawimawh leh mi tangkai tak mai a ni a. Marpara-ah hian Upa Pc Pakunga nen Primary Scvhool-2 an din a. Chumi kal zel chu tuna Marpara BCM H/S lo ni ta hi a ni.

Mizoram Baptist Kohhran-ah March 1, 1988-ah Contract-in a lut a, 2004-ah Tem,porary Post-ah hlankai a ni leh ta a ni.  Kum 1988-1997-ah Marpara-ah hian a thawk a, hemi chhung hian 1994-ah MTI –ah a Training bawk. Kum 1998-1999-ah Tuichawng-ah a thawk zawk a, 2001-ah DIET-ah Training lehin 2002 atanga a pension thleng Marpara ah hian a thawk zui leh ta a ni.

Kum 2013 Planning Commission-in Chakma Mission inrelbawlna a tih danglam khan Marpara Area-ah Area Supervisor-in dah a ni a, a pension thleng hian he mawhphurhna hi a chelh zui a ni.

Pu Ngurthankhuma Sailo hi pa taima leh inpe em em a ni a. Chanchin Tha leh Ramthim rawngbawlna a tuipui em em a. Ama zawna hna thawh tur apiang thahnemngai taka thawk a, thil tih thuai thuai duh mi a ni. Chakma Raea-a a thawhnaah hian inkalpawhna kawng te a tha lo va, chute chung chuan Ke-a kalin Area chhunga tih tur leh rawngbawlna thil a thulh phah ngai lo  va, chhungkuaah harsatna lian tak an tawk chung pawhin rawngbawlna kawngah theihtawpin a thawk reng tho a ni. A nupui, Pi Vanlalzami hi Cancer in enkawl mek a ni a, Kohhran hote pawhin tawngtainaah i hre reng ang u.

Mizoram Baptist Kohhran chuan Pu Ngurthankhuma Sailo Pension thlenga rinawm leh taima taka rawngbawlna hna a thawk thei hi a chhuangin a lawmpui em em a, Lalpa tana a hnathawh zawng zawngte avangin lawmthu a sawi bawk a ni.