#Lawngtlai Area Bru Mission hnuaia thawktute in tuai tharna neih a ni.
January 27-29, 2023 chhung khan Lawngtlai Area Bru Mission hnuaia thawktute pualin intuatharna (Bru Mission Workers’ Retreat) Baptist Mission School, Hruitezawl-ah neih a ni a. He hunah hian Rev. Lalremsiama Ralte, Mission Director chu Speaker atan hman a ni a. Speaker bakah hian Headquarters atangin Pu Lalthankunga Sailo, UDC, Mission Dept leh Tv. Rosangliana’n zaia rawngbawlin a tawiawm bawk. He Retreat-ah hian Bru Mission hnuaia thawktu leh an kawppui te an kal tha hle a, mi 70 zet an tel thei a ni.
#Asia Pacific Baptist Federation – Mission & Evangelism Committee Meeting-ah AGS Mission a kal.
February 1 & 2, 2023 chhung-a Asia Pacific Baptist federation – Mission & Evangelism Committee Meeting, Kualalumpur, Malaysia-a neih-ah Rev. Dr. R. Lalthanmawia, AGS Mission chu member a nih angin a tel a. He hunah hian ASIA chhim chhak lama rawngbawl zel dan tur te, Misson Pawl hrang hrang leh Kohhran te nena thawhho dan te thlirin hma lak zel dan tur te an sawiho a ni.
Asia Pacific Baptist Federation hi Baptist World Alliance-hnuaia Khawmualpui then pakhat khaikhawmtu niin, Asia ram leh Pacific thliarkar te an huam tir a, BWA hnuaia region lian ber niin, Independent ram 22 zet an awm a, chuta tang chuan Kohhran Inzawmkhawm (Convention) 59 an awm a ni. APBF Mission & Evangelism Committee-ah hian member 8 an awm a, Rev. Dr. R. Lalthanmawia hi BCM atanga a vawi khatna atan Misison & Evangelism Committee member niin Meeting-ah hian a tel a ni.
#Missionary Refresher Course Training kharna Inkhawm neiha ni.
January 23 -30, 2023 chhunga Missionary Refresher's Course Training Jubilee Bible School, Serkawn-ah neih chu tluang taka zovin, January 30 (Thawhtan) zan dar 6:30 khan, JBS Hall, Serkawn-ah Kharna Inkhawm neih a ni.
Training kharna Inkhawm hi Rev. PC Vanlalmuana’n a kaihruai a, Rev. K. Lalbiakenga, Principal, JBS-in Thuchah sawiin Rev. James Zorammawia, Lecturer, JBS-in Training chhuakte hnena Certificate hlanna kaihruaiin, Lecturer ten Certificate hi an hlan a ni. He hunah hian Missionary aiawh thusawi bakah BCM Ramzotlang atangin Group zai - Vesper melody leh Nl. K. Lalrammawii, Ramthar, Lungleite hnen atangin Pathian fakna hla ngaihthlak a ni bawk.
JBS-ah hian missionary thawklai te pualin Refreshers Course hi Mission Department leh JBS te buatsaihin neih thin a ni a, tun tuma Missionary Refreshers Course -ah hian Mizoram pawn atangin Missionary thawk lai mi 2, Chakma Mission-a thawk mi 7 leh Bru Mission-a thawk 1, an vaiin Missionary 10-in an awm a ni.
#Bru Mission Hnuaia a ram mi thawktu boral
Pu J.Vanlalpeka Evangelist Teacher, Nghalimlui a thawk chu hun engemaw chen Hepatitis B leh a kaihhnawih natna dang avanga a nat hnuin, February 01, nilaini zing dar 6:30 khan anmahni khua Nghalimlui ah a boral a, hemi ni vek hian vui liam nghal a ni. Pu J. Vanlalpeka hi Hindi zirtirtu ni in school tana thawhhlawk leh zirtrtu tha tak a ni a, BCM Mission Department chuan a ui tak zet zet a ni. Kohhran ho ten a kalsan a chhungte Pathian thlamuanna i dilpui ang u.
