Ringthar Baptisma chang :
i) September 30, 2012 Pathianni khan Ukdasuri-ah Chakma ringthar 3 Pu Jamadon, Evangelist-in Baptisma a chantir. BCM Immanuel, Tlabung in Crusade an neihpui nghal a, Ukdasuri Chakma kohhranten an hlawkpui hle.
ii) Oct. 6, 2012 Inrinni hian Zirakpur, Punjab, North India Mission Field-ah ringthar 8 in Baptisma an chang dawn a. Pathian hnenah lawmthu i sawi ang u. BCM Mission Field hrang hrangah ringthar Baptisma chang kan neih belh zel theih nan thahnemngai takin Lalpa i au ang u.
Bortuli Biak in sa zo tep :
Jharkhand-a Bortuli Biak in BCM Lunglawn bul tuma sak mek chu zawh dawn hnaih a ni ta. BCM Zote ‘S’ atangin Mistiri pahnih (2) ten Work Camp-in an sakpui a, Missionary te leh Bortuli kohhran member te an lawm tak zet a ni.
Work Camp nei dawn :
BMP Lunglawn Unit member sawm (10) chu Sikkim-a Missionary quarters saa Work Camp turin Oct. 10, 2012 Nilaini hian an chhuak dawn. Rinchenpong khuaa Pu Daniela Hnamte, Evangelist, i/c Sikkim Area awmna tur in an sa dawn a ni. Pathian hruaina i dilpui ang u.
Mission Convention :
Oct. 12 – 14, 2012 hian BCM Thingsai chuan Mission Convention neiin Thingsai chhunga Baptist kohhran dangte pawh sawm an tum. Speaker atan Mission Promoter Rbt. H.S. Lalhmingthanga an hmang dawn. Programme hlawhtling tak an neih theih nan i tawngtaisak ang u.
Chakma ringtharte ding nghet :
Tlabung thlang Khawthlangtuipui kam Thekaduar – Silsuri, Bolongsuri leh Theka V.C huam chhunga ringthar September 20, 2012 a Baptisma chang mi 148 te chu an ding nghet a. Chakma Evangelist te leh Tlabung kohhranten a in chhawkin an tlawh harh deuh reng. Biak in sak zai rel tan an tum. Tun tum hi BCM Mission-a Chakma ringthar tum khata Baptisma chang tam ber (record) a la ni. Lalpa chu fakin awm rawh se! Lalpan BCM Mission rawngbawlna mal a la sawm zel hi a va lawmawm em.
Mire rama kal tur Missionary thar :
Bangladesh-a Mire hnam zinga Missionary tura kal thar Pu C. Lalruatkima te chhung chu Laizo khuaah an khawsa ta rih a. A ram mi nih tumin hma an la mek. Birth Certificate an nei tawh a, 2012 chhung hi chuan Identity Card (I.D) pawh neih hman an in beisei. I.D neia Empu, Mire Area hqrs. an thlen thlak thuai theih nan i tawngtaisak zel ang u.
Thailand pan leh dawn :
Rev. Lalrinmawia Renthlei (Marina), Thailand-a kan Missionary te chhungkua, Mizorama lo haw te chuan August, 2012 khan naute thar – fanu pathumna an nei a. Passport leh Visa te tifel a, Thailand rama thlawh chhoh leh an tum. Tluang taka an thlen a, Thailand-a rawngbawl thei tura Work Permit (hnathawh phalna) an hmuh theih nan i tawngtaisak ang u. An han kal hmasak khan, Evangelical Fellowship of Thailand (E.F.T) Thailand-a Visa leh Work Permit chungchanga sorkar hriat (dilnain a kal tlang ngei tur) chu an in thlang thar a; hruaitu hluiten hruaitu thar te ‘charge’ an hlan duh loh avangin Marina te hian Work Permit an hmu thei ta rih lo a ni. Tawngtaipui zel ang u.
Missionary Tlangau hmel thar :
BCM Mission Chanchin Bu Missionary Tlangau chuan BCM Mission Map chuanna kawm thar a nei a, a chhung lamah thu bengvar thlak tak tak a chuang bawk. Kohhran member Mission lama tuite an lawm hle.
