IMA Hruaituten rawn zin
May 11, 2016 khan India Mission Association (IMA) hruaitu mi 3 chu BCM hruaitute rawn hmu tur leh Mission lama kan hmalak dan te a hmuna rawn zir chiang turin an rawn kal a. General Secretary hovin BCM hruaituten an lo dawng sawng a, Head of Departments(Director chin) te nen inkawmhona tha tak an neiin zanriah an kilho nghal. BCM leh IMA te hi thawkho(partner) an nih angin Mission rawngbawlna lamah BCM hian financial support te pe-in Conference leh Meeting hrang rhangah BCM aiawh palai a tir thin a ni. IMA hi India ram pumpui-a Mission lama Kohhran pawl hrang hrang inzawmkhawm pawl lian tak a ni. Tun tuma BCm rawn tlawhtute hi an General Secretar leh Executive Secretary te an ni.
Furlough Programme
A hnuaia tarlan kan Missionary te hian Pastor Bial hrang hrangah hetiang hian Furlough Programme an hmang:-
#Pu F.Lalsangzuala Evan. Andaman & Nicobar Island-a thawk mek chuan Thenzawl Pastor Bialah.
#ZD.Laltanpuia Evan. Arunachal East Field-a thawk mek chu Chandmari Pastor Bial, Lunglei-ah.
#Nl.Lalchhanmuani E/T Tripura Field-a thawk mek chu Theiriat Pastor Bialah.
#Nl.Lalhlimpuii Sailo E/T Tripura Field-a thawk mek chuan May 18-25, 2016 chhung Zotlang (Lunglei) Pastor Bialah a hmng bawk.
Mission Convention
#BCM Kalvary, Cherhlun chuan tunkar zirtawp zan atang hian Upa HL Liantluanga, Mission Promoter Speaker-a hmangin Mission Convention an hmang dawn a, Pathianni zanah an tiak ang.
#Hnahthial South Pastor Bial pawhin hemi hun chhûng vêk hian Pu C.Pachhunga Evangelist Arunachal East Field-a thawk, furlough deputation hmang mêk chu Speaker-a hmangin Mission Convention an nei dawn.
#Serchhip Pastor Bial pawhin tunkar Zirtâwp zan atang vêk hian bial huapin Mission Convention Serchhip Kohhranah an hmang dawn a, Dr. C. Vanlaldika, AGS i/c Mission Speaker-ah hmangin an bial chhung atanga Missionary-a chuak zawng zawng te Convention hmang tur hian chah chhuah an tum bawk.
Work Camp:
Mamit Kohhran chuan May 4-6 chhung khan Bijoynandi Tripura khuaah Work Camp an zuk nei a. School bang thlak leh Verandah siam hnate an zu thawhpui, Biak In-a hman tur Key Board stand mawi tak an siam sak bawk. Anni hi work camp an vawikhat kalna niin member 28 lai an kal. He work camp kal tur hian Kohhranhote pawh an tangrualin an phur a, hlawk thlak an ti hle.
Good News Society leh BCM:
Good News Society leh BCM hmalaknain kumin 2016 January to March chhung khan sakhaw dang betu atanga Kristiana rawn inpe, Baptisma chang mi 19 kan nei thei a ni. Anni nena kan thawhhona hi sakhaw nghet leh lianho zinga thawhna a ni a, heti chunga engemawzat ringthar kan han nei thei hi thawktute inpêkna ropui tak Lalpan mal a sawm a ni, a ropuiin a hlu em em a ni. Good News Society-ah hian Director tanglai chu Rev. C. Zatawna a ni. Tin, kan missionary thawklai atangin Pu Lalchhanhima leh Pu R.Lalsangzualate chu he mission-ah hian an bung mêk bawk.
Sawi tawh angin Good News Society hnuaiah hian Missionary 3 BCM atangin an bung mek a, a rammi thawk 13 an awm bawk. Anni hi Upper Assam leh Lower assam-ah te inthenin thahnemngai takin an bitumte an bei reng a ni. Kumin January ni 16 khan Duminichowki khua-ah Tamjed Ahmed-a te compound-a tawngtaina In In 30’x12’ a zau sak chu hawn a ni.
Tin, Good News Society tan hian Guwahati Airport bulah ram Sq Ft 6000-a lian an lei tawh a. A ram neitu hminglamin thlak fel a ni tawh bawk. He ram ruakah hian building thar sa turin hma an la mek a ni. Thawktute chuan hetianga ram zau tak an lei theih avang hian Pathian hnenah lawmthu sawipui tur leh building hi sak zawh a nih ngei theih nan tawngtaipui turin kohhrante min ngen a ni.
Good News Society-te rawngbawlna hi a hautak hle a, Muslim sakhaw betu leh Hindu sakhaw betu zinga, rawngbawlna a ni bik deuh a. Kristiana inlette hian nasa takin tihduhdahna an tuar thin. An In te an hal sak a, an vawm chhiat sak bawk a, luah ngam lovin an siam fo thin a ni. Chuvangin nasa leh zuala kan tawngtaipui hi a va han tul em! Heng mite hi Lalpa Hmangaihte an ni si a. Krista ke bula midangte hruai tur hian Kohhran hote kan theihna zawn teuhah Lalpa tan i tangho zêl ang u.
